كتب -معتز عباس
أعلن الفنان أحمد مكي عن تدشينه حسابًا عبر موقع التواصل الاجتماعي "فيس بوك"، للتواصل مع جمهوره، بعدما لاحظ تكرار الحسابات المزيفة التي كانت تتحدث بلسانه.
ونشر «مكي»، فيديو عبر حسابه الرسمي، بموقع «فيس بوك»، قائلًا: «اللي خلانى أعمل الصفحة دى إنى لقيت كم ناس سألت عليا لما غبت السنة اللى فاتت وبيستفسروا أنا اختفيت فين، وكنت حابب أشكرهم على سؤالهم عليا لأنه فعلا فرق معايا نفسيا وكنت محتاجه قوى».
واستطرد: «من يومين جيت أعمل صفحة فيسبوك لأني معنديش صفحة ولا ويب سايت حتى صفحة (مكي فور ريل) مبقتش بتاعتي خلاص، جيت أعمل الكلام له دا لقيت كارثة وملايين من الصفحات المفروض أنها باسمي وفيه منها فيرفايد، كلهم مش بتوعي معرفش إزاي، وجاتلي فكرة، قولت هعمل صفحة باسمي لا بالعربي ولا الانجليزي، هعملها بـ(سغة لمبة)، دي لغة اللي كنت بتكلم بيها زمان في الهرم مع صحابي، الناس التقيلة بتاعت زمان هي اللي هتفهما، وسميت الصفحة (سكي ملواني)».
وأضاف: «أنا كان بقالى سنة تقريبًا عيان جداً، كان عندي «فيروس» ضربلى الكبد والطحال، مكنتش حتى أقدر أشرب بق ميه بسبب الطحال، أول شهرين من المرض، عشان الكبد كان عملي خمول، كنت بأنام من 18 لـ20 ساعة في اليوم خسيت فوق الـ30 كيلو وكنت شبه فاقد للأمل».
وواصل: «الحمد لله على كل حال، أنا دلوقتي خفيت تمامًا ووزنى زاد تاني، واتعلمت كتير جدًا في الرحلة دى، وكان فارق معايا جدا سؤالكم عنى، حسّيت إن ليا أهل مش جمهور، وإني فرقت معاهم لما غبت، ربنا يفرح قلوبكم زى ما فرحتوا قلبي، وأهلًا بيكم في صفحتي».