قالت النجمة يسرا، خلال لقائها في الحلقة المسجلة قبل إصابتها بفيروس كورونا، في برنامج "الدوبلكس"، تقديم أبلة فاهيتا على قناة ON، أن لديها العديد من الأصدقاء، منهم إلهام شاهين وإيناس الدغيدي وليلى علوي.
وعن سؤالها من هو الشخص الذي لو تقدم لها كان سترفضه، قالت: "كان نفسى أتجوز براد بيت، ولو اتقدملى مكونتش هارفضه، بس أنا منكرش إن أحسن حاجة حصلتلى إن زوجى خالد سليم اتقدملى لأني بحبه جدًا".
وأكملت يسرا: "أكتر فيلم اتسبب في شهرتي كان (ليلة شتاء دافئة)، مع عادل إمام، وحقق نجاحًا ساحقًا، واستمر 36 أسبوع كومبليت، وكان بيتعمل حفلات منتصف الليل".
وأضافت: "رشدي أباظة كان شيك وذوق ومفيش حد زيه في معاملته لأي ست، أما عمر الشريف فكان حدوتة مش هاتتكرر، وكان كاتم أسراري، وأحمد رمزي كان دمه خفيف جدا وجدع".
وتابعت: "ركبت مرة مع صالح سليم في الطيارة وكنا رايحيين السعودية وجت مضيفة شايلة الأكل ولقيتها بترتعش، بقولها مالك، قالتلي أتجوزه ليلة واحدة واطلق بعد كدة مش مشكلة".
واستطردت يسرا: "أنا أعرف فاتن حمامة وكنت لما بحتاج نصيحة بكلمها وعمرها ما بخلت عليا، وكنت لما باخد رأيها عمرها ما تقول الحل ولكنها بتفتح سكة تكملي أنتِ بيها بطريقتها، وكان لها لقاء قديم بيسألوها اتعلمتي إنجليزي وفرنساوي منين وقالتلهم من الراديو، رغم إنها كانت في مدارس عربي".
وعن شادية، قالت: "كنت معاها في فيلم لا تسألني من أنا، وضربتني قلم طيرت وشي وراح مني الكلام ومعرفتش أنطق رغم إن إيدها صغيرة، بس كانت مسمياني غروم.