حبس سارة الطباخ عامين بتهمة تبديد أموال الشرنوبي

أصدرت محكمة جنوب الجيزة الابتدائية، حكمها، اليوم، في الجنحة رقم 1626 لسنة 2020 جنح الشيخ زايد، بحبس المنتجة سارة الطباخ عامين، بسبب تبديدها مبالغ مالية للمطرب محمد الشرنوبي، بموجب توكيل رسمي، وخيانة الأمانة.

وتعود تفاصيل الواقعة إلى تلقي غرفة النجدة بلاغا من سارة تطلب فيه تحرير محضر لفقدها "سكوتر" مسروق منها، داخل أحد كومبوندات أكتوبر.

وجدير بالذكر أن سارة والشرنوبي، كان بينهما علاقة عمل، ثم أصبحت علاقة حب وتمت خطبتهما، ولكنهما انفصلا وثارت بينهما العديد من المشاكل.

وكان الشرنوبي، قد روي القصة كاملة، قائلاً: "في سبتمبر 2017، بعد مسلسل لا تطفئ الشمس وحلقات صاحبة السعادة، وحفلة الموسيقار الكبير عمر خيرت، وأغنية (مين فينا) مع النجمة الكبيرة أصالة، وبعد ما كنت لسّه ماضي مسلسل كأنه امبارح وفيلم الممر، جالي شغل مع شركة كبيرة عشان أنزلّها بوست على إنستجرام عندي، واللي كانت ماسكة الحملة دي واحدة اسمها سارة الطباخ، نشأت علاقة صداقة لطيفة وكانت بتقنعني إني أحترف الغناء، في فترة كنت عاوز أركز في التمثيل".

وتابع الشرنوبي: "سارة كانت إنسانة جميلة وجدعة جدًا، الموضوع بعد كده اتطور من صداقة لعلاقة حب، وبقى فيه ما بينا ثقة واحترام بس دي كانت بداية مشاكل قوية جدًا حصلتلي في حياتي، أهمها عدم رضا أبويا عن العلاقة دي بسبب إن فرق السن بيني وبينها 15 سنة، وده كان السبب الرئيسي إن أبويا مكانش موجود في فيديو قراية الفاتحة اللي معظم الناس شافته".

واستطرد: "بالمناسبة الڤيديو ده اتصور يوم 5 أبريل 2018، وفضل أبويا زعلان مني فترة وما تصالحناش غير لما حضرلي أول حفلة أعملها في حياتي وده كان السبب في إني عيطت ونزلت من على المسرح".

 وأضاف الشرنوبي: "اقتنعت برأيها إنى أمثل وأغني في نفس الوقت، بعدها فوجئت بيها بتقدملي عقد احتكار مدته 10 سنين والشرط الجزائي اللي في العقد 600 ألف دولار وماليش حق إمضاء أي عمل سواء تمثيل أو غناء، وللأسف دي غلطتي، أنا كنت متخيل إن شروط العقد ده؛ الشروط المتعارف عليها، ولما خفت وقلقت من الشروط دي شوية كانت سارة بتقنعني إن دي مجرد شكليات وإن كل حاجة هتم بالتراضي".

وتابع: "قالتلي بالحرف أي وقت هاتيجي تقولي فيه إن العقد ده مش مريحك هديلك العقد، عمري ما هغصبك على حاجة، وبسبب ثقتي فيها وحبي ليها وافقت على كل ده ووافقت كمان أمضي العقد ده رغم أنه كان معمول بتاريخ قبله بـ 10 شهور، ومن بعد ما مضيت العقد وبعد ما قريت الفاتحة اللي وقفت قدام كل الناس بسببها، لقيت طريقة تعامل مختلفة تماما وتوتر بدون أسباب بيحصل بيني وبينها.

 واستكمل الشرنوبي: "فسخت الخطوبة في يوليو 2018 يعني بعد 3 شهور بالظبط من قراية الفاتحة وماكناش لسه ساعتها اشتغلنا على الألبوم، وقلتلها أني مش حابب أكمل شغل خلينا أصحاب أحسن، وكان فيه محاولات معايا من ناس كتير مشتركة ما بيننا عشان يصلحوا الموضوع لأكتر من شهر، ووافقت إننا ندي نفسنا فرصة تانية كتجربة عشان كان عندي مشاكل كتير في طريقة التعامل، ورجعنا وكانت الحياة كويسة في الأول ورجعنا نشتغل تاني وبعد فترة بدأت المشاكل ترجع تاني وبشكل أسخف وتسببت في مشاكل كبيرة بيني وبين أهلي وأصحابي القريبين وحتى أي حد في الوسط بقى بيتجنبني أو بيتجنب التعامل معايا لمجرد إن هي اللي ماسكة شغلي عشان طريقتها مكانتش كويسة خالص، وبدأت تحاول تتحكم في كل حياتي وعلاقتي بكل اللي حواليا".

واختتم حديثه: "بدأ يبقى فيه استخدام لفكرة العقد بشكل واضح والمشاكل بقت شخصية ومهنية، ولما مارضتش أكمل في علاقة أنا حاسس إنها مابقتش مناسبة ليا ولا أنا ولا الطرف التاني، بقى فيه أساليب تانية للضغط، آخرها كان فيديو الخطوبة اللي نزل وإحنا أصلاً مش مع بعض، ولأني عمري ماكنت حابب إن حياتي الشخصية تبقى مجال للكلام ولأن فعلاً الخطوبة دي حصلت في يوم من الأيام ولأني عمري ما هجرحها أو أحرجها، ماعلقتش خالص على وعد منها إننا ننزل بعد فترة إن الخطوبة اتفسخت لأن إحنا فعلاً دلوقتي مش مخطوبين".