نشرت الفنانة حلا شيحة اليوم عبر صفحتها الشخصية علي "انستجرام" صورة لجنازة متوفي، وعلقت عليها قائلة: " مشهد محتاج لحظات للتأمل ووقفة طويلة مع النفس، كل ما تحصل حالة وفاة من قريب أو بعيد بلاقي نفسي جوا المشهد وبتخيل اللحظة دي لأنها مفيش مفر منها، حتيجي فجأة أو بعد مرض المهم انها جاية وكلنا حنمر بيها، وبفكر يا تري هل أنا مستعدة للحظة دي؟! مستعدة لاستقبال عالم تاني؟! مستعدة اقابل رب العالمين ؟! مشهد مرعب أكن الامتحان خلص خلاص ومستنية النتيجة".
وتابعت حلا شيحا، التي نشرت نعيا عقب وفاة الفنان سمير غانم: " كل يوم بيموت من حبايبنا وأقرب الناس لينا كلنا بنحضر الدفن والعزا، طب وبعد كدة ايه! منا اللي بيكمل عادي زي ما كان ومنا اللي مش عايز يركز في اللحظة دي، ومنا اللي بيفكر شوية وخلاص بعدها بينسي، ومنا اللي مش حيعدي عليه المشهد ده كدة و خلاص".
View this post on Instagram
A post shared by Hala Shiha (@halashihanew)
وأستكملت: " انا بسأل نفسي ياتري احنا بنفني عمرنا في ايه و في مثل مشهور بيقول (العمر مش بعزءة ) مركزين بس في نجاحاتنا وأمالنا و مراكزنا، في مشاكلنا ومطحونين في دوامة عمرها ما حتخلص، ياتري ربنا في حياتنا فعلا؟! ولا نسينا في الزحمة نفكر إننا ماشين، ليه بعد كل موقف وفاة مؤلم زي ده بننسى وبنرجع تاني لنفس الحال بتاع بكرة حبقي أحسن، بكرة حصلي، بكرة حرضي ربنا بجد، وناس ناسية ربنا اصلا ده حتي بقي الخلاف علي الدين نفسه، ده حتي الشك اللي اتبنى جوانا من كتر البعد عن ربنا بقي يخلينا نشك في وجود ربنا أصلاً، المعايير اتغيرت جوانا و الاولويات اتلخبطت".
وأردفت: " مفيش أية في القران عن الدنيا إلا والكلام إن الدنيا لهو و لعب و متاع الغرور، و اتحدي اي حد يلاقي غير كده، وبقول لنفسي يا ترى أنا فين من المعاني دي، وبسأل نفسي لو مسألناش نفسنا دلوقتي حنسأل امتي؟! الدنيا اللي حنعيشها أيام و حنفارقها وبردو متمسكين بيها، وفجأة هنلاقي نفسنا في المشهد ده!! لحظة الصدق هي دي (لمثل هذا فليعمل العٰاملون )" .
وقالت حلا شيحة: " "مشغولين برأي الناس فينا وشكلنا ومكانا وشهرتنا حتزيد ازاي ومحدش حينفعنا في اللحظة دي، بفكر كل لحظة علشان بحب ربنا، ومتأكدة اننا كلنا بنحبه وبنحب كلامه وكلنا لينا لحظات خاصة معاه سبحانه، وكلنا عايزين نكون قريبين منه، وإحنا بنبعد بدل ما نقرب حتي شهر رمضان بقي شهر لكل حاجة إلا ربنا والقرآن مع إن مفيش أهم من آيات القرآن اللي إحنا ناسينه بقالنا كتير، وحتي لما نقراه بيعدي من غير تركيز حقيقي في معانيه وكورونا اللي حاسه إنها دخلت حياتنا عشان تفكرنا وبردو مكملين عادي".
واختتمت "شيحا" قائلة: "مش عارفة أعدي المشهد ده كدة وإمبارح فضلت صاحية وصليت الفجر ومش عارفة أنام ، بفكر في استاذ سمير غانم الجميل اللي كنت بتفرج عليه من صغري وقبله أستاذ محمد الصغير، وفكرت لو ده كان معادي حكون مستعدة؟! كلام صعب بس ده اللي جوايا".