علقت الفنانة هاله صدقي، على الأزمة الأخيرة والانتقادات التي وجهت للفنانين بسبب حضورهم حفل زفاف فى نفس يوم عزاء الفنان سمير غانم.
حيث كتبت هالة صدقي في منشور لها عبر حسابها الرسمي علي موقع التواصل الإجتماعي " فيسبوك"، قائلة:"زي ما العزاء واجب الفرح كمان واجب، الفرح يوم في العمر وخصوصا لو حد عزيز عليه جدا ومنتظر أشاركه اللحظه دي، المعروف جدا إن أي فنان وأولهم سمير غانم ينزل يعرض ويضحك ويسعد جمهوره لكن قلبه من جوه كله حزن وأكبر مثال العظيم عادل إمام دفن مصطفى متولي صاحبه وجوز أخته الظهر ونزل يعرض بالليل وبعد ما نزلت الستاره إنهار".
وتابعت: "مش عادل بس لا في غيره وغيره وغيره، للاسف الفنان بيبقي مطلوب منه فوق طاقته وأصحابه وحبايبه منتظرين منه أكتر، عمر الحزن ما كان بلون الأسود أو البكاء، ولاد سمير النهارده مؤكد لابسين ملون علشان مامتهم ما تعرفش باللي هما فيه هل ده معناه أنهم مش زعلانين ومقهورين علي باباهم، وهي قدرات ممكن حد يقدر يتغلب على أحزانه وناس لا، وعلي فكره أنا مكنتش معزومة على الفرح اللي زملائي كانوا فيه، كنت معزومه في فرح تاني خالص والنهارده كمان كان عندي فرح حد من أعز أصدقائي.
واختتمت "صدقي"قائلة:" كلنا عارفين الأصول إن لما حد يموت نقفل التلفزيون وبلاش مزيكا وحاجات كلنا عارفينها، لكن للأسف في ظروف خارجة عن الإرادة وبدل ما نحاسب البشر واحنا عندنا رب هو المسئول عن اللي في القلوب، ندعي للزميلة والأخت العزيزة دلال إن ربنا يقومها بألف سلامة وترجع لبيتها وولادها وتتحمل فراقها لحبيب عمرها ، شكرا لتفهمكم".
وكان الفنان سمير غانم توفي عن عمر يناهز 84 عامًا وذلك بعد صراع مع كورونا وتم دفنه بمقابر الوفاء والأمل.