احتل اسم النجمين تامر حسني وحلا شيحة قمة قائمة الأكثر تداولًا على موقع التواصل الاجتماعي تويتر، بعد الاتهامات المتبادلة بينهما بسبب المشاهد الرومانسية في فيلم "مش أنا"، والتي تبرأت منها حلا وهاجمت تامر بسبب أنه أخلف وعده بشأن حذف هذه المشاهد.
ونشرت حلا شيحة صورة تحمل عبارة "مش أنا"، وعلقت عليها بقولها: "أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة أيام مباركة وخصوصاً بعد آخر بوست نزلته ووضحت فيه انا ايه.. واتفاجئت اكتر خصوصا بعد وعد تامر حسني ليا وتأكيده انه هيحترم رغبتي وبعض الطلبات اللي طلبتها منه بكل احترام وود الصيف اللي فات واكدلي انه هيحترم رغبتي".
وأضافت :"احنا يمكن نجحنا بمقاييس الدنيا بس صدقوني بمقاييس ربنا احنا لم ولن ننجح، انا عارفة ومتاكدة ان زملائي جواهم خير بس للأسف فتنة الشهرة والنجاح مش بتخلينا نشوف ونقيس الامور صح، بتكلم من قلبي الكليب ده ميرضيش ربنا وانا عيطت لأني شفت نفسي في المشاهد دي.. دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر بس المصيبة اننا بنغفل وبننسى".
وتابعت :"انا مش حتكسف من حد انا تبت من المشاهد دي وهي لا تصح وانا غلطت وبصلح واهم حاجة ان ربنا يرضى عني لان في الاخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليل منا، الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن".
وواصلت حلا: "احنا كلنا عندنا امتحان في الدنيا دي وحابة افكرك بالفيديو ده يا تامر اللي قولت فيه انا مش بتمنى أموت وأنا مطرب انا دايما خايف من كده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك ان جواك اكيد في صراع وانا وكلنا كلنا بنغلط بس المهم في الاخر نتدارك الغلط ونصلح .{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".
ومن جانبه رد تامر حسني في منشور على فيسبوك قال فيه :" للتوضيح بما إنك يا حلا كتبتي بوست وأشركتي الجمهور الكريم معانا، بدل ما كنتي تكلميني شخصيا، ونتناقش بيني وبينك، فأنا مضطر أرد هنا برضو، أولاً أنا عمري ما وعدتك إن الكليب مش هينزل، دا محصلش أصلاً يا حلا، مش أنا خالص اللي أوعد وأخلف، والحقيقة إني احترمت كلامي معاكي، ووعدتك أشيل مشاهد تانية طلبتيها، وشيلتها بالفعل، وشكرتيني عليها، ولو حابة تفتكري المشاهد اللي اتشالت، بعد إذنك روحي شوفيها في المونتاچ، عند الأستاذ عمرو عاكف، أو كلميه يبعتهالك، كلها موجودة".
وتابع: "وبعدين الفيلم بقاله 3 أسابيع في السينمات، والكليب موجود جوا الفيلم، هو بالنسبالك الحرام، إننا ننزل الكليب على اليوتيوب بس!! إنما الكليب يتشاف جوا السينمات عادي؟؟ منطق غريب فعلاً يا حلا".
وواصل: "وبعدين هو مش انتي اللي مضيتي عقد، وتقاضيتي عليه مبلغ كبير، عشان الدور دا بعينه!! هو مش انتي اللي صورتيه ومثلتيه بنفسك، وبمنتهى الرضا، ولاّ حد أجبرك؟!".
استطرد: "وللتوضيح للجمهور الكريم، أنا والمخرجة الأستاذة سارة وفيق، بعتنالك وكنا بنتحايل عليكي تيجي تشوفي شغلك، قبل إصدار الفيلم، عشان لو عندك أي ملحوظة تقوليها، ماكنتيش بتردي علينا، وتليفوناتك كلها كانت بتقفل في وشنا".
وواصل تامر: "انتي للأسف يا حلا متعاملتيش صح مع الموقف، كان لازم تهتمي بأمرك أكتر من كدا، ولو كان ليكي أي طلب تاني كنت هعمله بكل حب، إنما انتي فجأة أختفيتي، ومكملتيش تركيب صوتك في الفيلم، ولا جيتي تتصوري عشان الأفيش أصلًا، ومخليتيناش نعرف نعمل أفيش مجمع!! وبقيتي تقفلي تليفوناتك وتكنسلي علينا كلنا/ وبعدين أي فيلم بيبقى ليه خطة مسبقة في الدعاية، وانتي عارفاها كويس، ووافقتي عليها، ودا كليب رومانسي، يعني معقول كنتي عايزة المنتج يشيل كل مشاهدك اللي صورتيها من الكليب، ويطلعني بغني وبقول الكلام الرومانسي دا للأستاذ ماجد الكدواني مثلا، هو دا يُعقل؟!"
واختتم تامر بالقول: "أنا زعلان منك جدا يا حلا، على مفردات البوست بتاعك غير الموفقة، ومستحيل هرد بطريقتك اللي فيها تجريح واتهامات باطلة ليا، احتراما لحاجات كتير يمكن فايتاكي، بس مش هتفوتني، وعلى فكرة أنا واثق إنك عارفة إني مستاهلش منك كدا، وهكتفي بالتوضيح دا، وربنا يهدي الجميع، ويكتبلك كل الخير.. اللهم آمين".
