تداول النشطاء على موقع التواصل الاجتماعي "فيس بوك"، بشكل مكثف خلال الساعات الماضية، منشورًا كتبه أحد مستخدمي الموقع، والذي تحدث عن تجربته مع إحدى الشركات المشهورة في مجال إبادة الحشرات، ليحذر الجميع من التعامل مع مثل هذه الشركات.
وقال ناشر البوست ويدعى محمد منصور: "عندي فأر في الشقة بقاله كام يوم؛ حاولت اطلعه بكل الطرق الممكنة لكن للاسف مطلعش. قلت ألجأ للمتخصصين، واتصلت بالمركز الأمريكي لأبادة الحشرات والقوارض. سألتهم عن طريقة شغلهم قالولي انهم بيرشوا مواد كيميائية دون رائحة وبيطلعوا الفأر قبل ما يمشوا. أكدت عليهم اذا كانت المواد ملهاش ريحة وقالوا اه".
وأضاف: "المندوب جه؛ ومعاه قزازة ميه محطوط فيها المادة؛ سألته عن نوع المادة قالي دي بتيجي في جراكن كبيرة من بره وبنحطها في زجاجات عشان نقسمها ونشتغل بيها. سألته اذا كانت المادة من غير ريحة ومدى سميتها فأكد ان المادة فعلا ملهاش ريحة اطلاقا وعديمة السمية "وهتطلع الفأر في ثواني".
وتابع: "دخل المطبخ وبدأ رش؛ كنت قاعد بره وسايبه يشتغل؛ بعد دقائق شميت رائحة نفاذة جدا؛ وعرفت من الريحة ان المكون الاساسي للمبيد هو النفثالين، ودى مادة سامة في كل صورها، وطلبت منه وقف الرش فورا؛ كان عايز يرش باقي الشقة ورفضت. قالي هحط لك سم للفأر؛ طلبت يوصح لي تركيبة المادة اللي رش بيها وقالي معرفش؛ وطلب مني ألفين جنيه ثمن رش المطبخ بالنفثالين! قلت له انا عايز فاتورة ضريبية؛ وعايزك تقولي نوع المادة اللي رشيت بيها بيتي؛ واثبات على كونها مش سامة أما هطلب الشرطة".
واستطرد: "تواصل معايا عدد من الناس في الشركة؛ منهم واحد اسمه خالد مهران عرف نفسه انه مفوض الشركة القانوني. قال لي احنا مش عايزين فلوس؛ وسيب المندوب يمشي. رفضت وقلت له لو مأثبتش امان المواد اللي رشيت بيها بيتي انا هطلب الشرطة، والمندوب؛ وهو شاب صغير، بدء يتوتر والخوف ظهر عليه جامد وعنيه دمعت وفضل يقول لي انا مليش دعوة. سيبني امشي انا شغال في الشركة عامل ومليش دعوة. ومع توتره صعب عليا؛ خصوصا لما حسيت من لهجة الاشخاص اللي بيكلموني انهم مش باقين على المندوب والولد لو سلمته للشرطة هيتبهدل وهيبات ايام في الحجز لحد ما يحللوا المواد اللي معاه ويشوفوا الحكاية، قررت امشيه؛ وبدعى ربنا ان المواد اللي اترشت متسببش اي مشاكل وان الريحة تروح علطول".
واختتم: "اتمنى محدش يغلط غلطتي ويتصل بالنصا.بين دول. ويتأكد قبل ما يرش بيته بأي مبيد انه آمن على الصحة أو يسيب البيت اثناء رش المبيدات الخطرة، الفئران ارحم من النصا.بين دول والله".
