ننشر قصيدة جديدة للشاعر الشاب “ محمد البشبيشي “ من ديوان “ كبرنا بنكره التفاح “ والمتوقع صدوره قريبا .
على سبيل الهزار
هانتحر
هاخد شريط أقراص أي حاجة
ماتكونش ليها علاقة بالأمراض اللي عندي
وانتحر
كان جميل
إني أكون مدرك
انتهائكم بعدها فورا
مدرك إني
مش هاكون مدرك
لحزنكم السخيف
وانتوا بتخترعوا القصص
اللي بتجمعنا
بتتحولوا فجأة لبتحبوني
مدرك إني مش هاشوف حبيبتي بتبكي
وانتصر مرة
مش هاشوف ندم أهلي
كتابات صحابي على صفحات التواصل
الجميع بيعرفني
الجميع بيود يعرفني
بيود لو ليه ذكرى تجمعنا
مش هاشوف كل دا
مدرك كويس
هانتهي
زي مابتخلص سجايري
و ربما شبحي ما يطلعش شاعر!
هانتحر
وانا مدرك لكوني هاتحول اداة
هانسلخ م الدنيا دي زي صيف عدى
زي بنت جميلة عديت على القهوة
زي نعناعة في براد شاي
زي ناي من مكان مجهول
هانسحب وانا مدرك اني
مش هاحس بأي انتصار منكم
وانا مدرك تماماً أن انتوا أضعف كتير
من إني انتقم منكم
لكن " خصومة قلبي مع قلبي "
والحياة اصعب من انها تتكتب بالشعر
وعن قريب هاتعلم الموت على اصوله
ممكن يكون الموت اسهل من انه يتكتب بالشعر
وربما شبحي مايطلعش شاعر
هانسحب وانا متدرب على الضلمة كويس
على الاسود
على اني اكون نعناعة في شفايف حد
او صبارة على بزاز امهات بتفطم عيالها
متدرب على الموت وبنط حبله كل يوم
هانسحب وانا
متدرب على الوقت و الوحدة
وع اليتم
وع المجهول عموماً
ببساطة هانسحب
وربما شبحي مايطلعش شاعر!