هاجم الجمهور على مواقع التواصل الاجتماعي، الإعلامي عمرو أديب، بعدما تحدث أمس الجمعة، عن كواليس أغنية محمد رمضان في حفل افتتاح مهرجان الجونة.
وقال أديب في برنامجه "الحكاية" المذاع على قناة MBC مصر "إدارة المهرجان كل سنة عندها أغنية المهرجان أول سنة 3 دقات كسرت الدنيا السنة اللي فاتت كان في رامي عياش وتامر حسني، السنة دي بدون سبب واضح قرروا أغنية الحفلة يعملها محمد رمضان".
تابع أديب "حصل حاجة غريبة جدًا في أول الحفلة طلبوا من يسرا وسميح ساويرس يقولوا كلمتين عن الحفلة، وفي الآخر جاءت المذيعة الفاضلة وقالت وآخر حاجة عندنا في الحفلة الفنان محمد رمضان ومشيت".
أضاف أديب "محمد رمضان طلع معاه اتنين مطربين اسمهم اقوي من اسمه في الغنا مية مرة جايز هو أقوى في التمثيل، وقبلها على طول المذيعة طلعت يسرا وسميح علشان يقدموا رمضان وهما مكانوش عارفين".
استرسل عمرو أديب قائلًا "وفجأة دخل رمضان غنى اغنية جو البنات حاجة ملهاش علاقة بالمهرجان وواضح أنه استعراض اتعمل بسرعة فمكنش حلو، الأغنية قعدت 3 دقايق ملهاش علاقة بأي حاجة ولما خلصت ورمضان هيبدأ يتكلم النور اطفى والمايكروفون فصل ودة شيء غريب لا الأغنية صح ولا اللي اتعمل صح ومحدش فاهم"
كما تعجب عمرو أديب مرة أخرى من طريقه تقديم محمد رمضان وإغلاق النور بعد 10 ثوان وتساءل "لو مش عايزينه جايبينه ليه".
وأثار كلام الإعلامي استياء المتابعين الذين اعتبر بعضهم أنه يهاجم رمضان بسبب المشاكل بينهما والتي وصلت إلى ساحات القضاء.
ومن التعليقات التي كتبها الجمهور تعليقًا على الفيديو الذي تحدث فيه أديب، ونشرته صفحة برنامجه على فيس بوك :"عندك عقده نفسيه اسمها محمد رمضان وبعدين النور مقطعش القناه هي اللي وقفت البث لكن هو كمل عادي وشكر الناس والاغنيه اشتغلت تاني وبشرى طلعت وقدمتله ورد ماتشغلش بالك انت بس"، و"طب هو النور مقطعش عليه ولا اي هري من دا القناه هي اللي وقفت البث عن كلامه، هو شكر عيلة سويرس و المهرجان والمجهود وانه حضر و بتاع وقامت الاغنيه اشتغلت تاني و رقص هو و بشري"، و"عندك عقدة نفسية اسمها محمد رمضان هذا الانسان ربنا معطيه ع قد نيته و طيبته"، و" رمضان عملك عقده ياعمر"، و" ياخي ياريت تخليك فحالك وبس بتحاربه ومتفيش فايده من عدوانك ده فا اهمد".
