بس أنت علمتنى أسد وأكون قدها وأتمسك بالحلم والأمل مهما كان الواقع صعبا ومرا وعنيدا
علمتنى أفتح عينيا للوجود وأشوف أبعد من قسوة الواقع
وأدور على خيوط للخلاص والنجاة
وأنا باوعدك إنى ح افضل أحاول لحد لما نتقابل
يا رب أقدر أوفى الوعد الحق وزى ما نتمنى احنا الاتنين إنو يكون
أنا كنت دايما على يقين تستحقه
بقيمتك الكبيرة ورحلتك العميقة والملهمة ف كل خطوة فى الدنيا دى من ساعة ما وعيت
من أمتى
يمكن من قبل المدرسة
أول يوم مدرسة لما العيال كانت بتقول أنا بابايا بيشتغل مهندس وأنا دكتور وأنا محاسب وجه الدور عليا
وكنت بحب لعبنا بالكلام وحافضة أغانيك وعارفة إنك أنت اللى كاتبها بس مش عارفة اسم «الشغل» إيه
جه الدور عليا اتلخبطت
سألونى بابا يعنى مش بيروح الشغل؟
قولتلهم بيروح الشغل ف أوضة المكتب
بيكتب
وأصحابى الجداد ما فهموش
ح أتاكد من اسم شغله وأقول لكوا بكره
وروحت متضايقة لأنى ما كنتش عارفة اسم الشغل
وسألتك
بابا
هو أنت بتشتغل إيه
ضحكت وقولت لى إيه ده هو أنت مش عارفة
قولت لك عارفة بس يعنى مش عارفة يعنى الشغل اسمه إيه
أنا شاعر
يعنى أقول لأصحابى بابا بيشتغل شاعر
أسئلة وأجوبة كتيرة اتفردت قدامنا ف اليوم ده
وتانى يوم
اخدت الكلمة وروحت المدرسة فرحانة علشان عرفت الاسم وفخورة
وقولت لهم لاصحابى الجداد اللى عارفين اسامى الشغلنات
يعنى بابا شاعر
أدركت أنه شغله ده يمكن برضه ما يفهمهوش صحابى لأنه مش شبه الشغل المعروف بتاع باباهاتهم وماماهتهم
وقعدت أشرح لهم تانى وأغنيلهم أغانى
طلع منهم كتير عارفينها
بحبك حب أكبر من طاقتى على استيعابه أو الكلام عنه
مش ح اتكلم عن محبتى لأن لسه ما عنديش اللى يرتبها ف كلام قد قيمتها أو حتى قد جزء صغير منه
وممتنة ومحظوظة إنى أتولدت بنتك
ويا رب أكون قد المسئولية والامانة اللى زرعت محبتها فيا
وزرعت زيها ف اصحابك الكتار اللى من ضمنهم اولاد جيلى - جيل ثورة يناير بأحلامهم وأحلمها بالحياة الحرة الكريمة العادلة عاجلا أم آجلا.. بالعمل الدؤوب مستمر ف اتجاه الحلم.
كنت دائما أخاف أن تبدو شهادتى مجروحة
وكنت أحاول أدبا كبت جماح حماسى التلقائى فى الكلام عنك
علشان بحبك قوى
بس ما كنتش برضه باقدر أسكت
وكنت مع الأيام بلاقى كتير بيتكلموا بدالى عن محبتك
أولادك الحلوين التانيين الكتير
بابا الحبيب الغالى الملهم الشاعر
علمتنى الكتير
أتعلمت منك الحب كما أحب أن يكون
أتعلمت منك الامانة والاجتهاد
أتعلمت منك أن المعرفة والعلم واجب
وأنهم بحور مش قشور
اتعلمت منك احترام الناس الطيبة
والوقوف ف وش الغلط برجل ثابتة
وبضمير ما ينام
بابا
أقولك إيه
اقول عنك إيه
كل اللى انت قولته موجود وباقى وأثره ممدود
كلامك فعل فعال مش مجرد كلام مرصوص
كلام مليان فن وإيمان ووعى وعلم
كلام مبسوط على وتر مشدود تجاه الحلم
بابا
ابن البحر
الصياد الأمير
جناينى وردة شبابك
الموهبة الشقية الحكيمة الأصيلة
الإنسان الفنان الواعى بدوره وبقيمة وجوده الاكبر من حدود حياته
واللى ما ضيعش لحظة من عمره بره حلمه ووعيه بالامانة ومحاولته لتوصيلها لاهلها
المستغل لكل فرصة مهما كانت بسيطة
لطرح الوعى الأعمق بالأشياء من خلال فنه أو بسرده المعرفى ف الكلام العادى بتاع كل يوم
وللتعلم من معطيات المحيط بالتجربة والبحث السمعى والبصرى المستمر
الشاعر على باب الله والوطن والانسانية
أمير حواديت الحق والخير والجمال
الصياد النبيل ف بحور الوجود
صاحب جنيات بحور الشعر
سيد حجاب
الشاعر الساعى الدائم للعلم والمعرفة والاطلاع
والتأمل والتحليل والإدراك الأعمق لظواهر الأمور
المهتم بالالمام بما يحدث فى الدنيا على جميع المستويات
الصادق المخلص المحب
المحافظ على مسلكه
الماسك فى نفسه لا العلل تمسه
الواصل لبر الأمان
بالموهبة والمعرفة ووضوح البصيرة
واجتهاد العزيمة والتقدير الدقيق للذات
ولقدرة الإنسان ولأهمية مسيرة العمر
كان معنا فى العالم فى مهمة إنسانية
وكان أهلا لها وأخلص لها
بموهبته وعلمه وسعيه الدائم
وثبات موقف ضميره
وإيمانه بالحلم
ووعيه الدقيق بالواقع
وتفاؤله وأمله ب بكره أجمل من النهارده
بابا
كلامى ملخبط ف لحظة ملخبطة خالص على المستوى الخاص والعام
تستاهل حاجات كتيرة حلوة خالص خالصة زى ما أنت حلو خالص
وأما الزبد ف يذهب جفاء وأما ما ينفع الناس ف يمكث فى الأرض
بنتك الوحيدة.. يا بابايا الوحيد
بنتك المحبة.. يا من تستحق خالص المحبة والتقدير
ريم... .