حذّرت الصيدلانية نورهان حجازي، من النصائح التي تم تداولها بكثرة خلال الفترة الماضية عبر مواقع التواصل الاجتماعي، والتي تدعوا إلى استعمال الجاز الأبيض للشعر، مؤكدة أنه يسبب كوارث خطيرة.
وقال حجازي عبر صفحتها على فيسبوك :"طبعا كلنا شوفنا التريند في الفترة الأخيرة دي عن انتشار حاجه اسمها "الجاز الابيض" للشعر، انه بيعالج تساقط الشعر والتهابات فروة الراس وتطويل وتنعيم وكثافة ولمعان الشعر وتنبيت الفراغات فالشعر، طبعا لازم كلنا ننتبه ان انتي كده بتجيبي كارثه لشعرك تعالو نعرف ليه ؟؟! ".
وأضافت :"دلوقتي الجاز زي البنزين والزفت والقطران،يعني قابل للاشتعال ومش بس كده ده ماده سامه اصلا،يعني انتي لو دخلتي المطبخ وانتي حطاه ع شعرك ممكن راسك تشم النار تولع وشعرك يتحرق طبعا ومش هتعرفي تلحقيه يعني لو انتي حطاه واعده مع حد بيشرب سجاير وراسك تشم دخان السجاير تخيلي اي ممكن يحصل".
وتابعت :" نيجي بقي لموضوع انه بيطول الشعر هو فعلا بيطول في خلال شهر مثلا وده لانه بيعمل التهابات شديده جدااا في فروة الرأس بينتج عنها وصول الدورة الدمويه اسرع لبصيله الشعر بس للاسف الشعر بيبدأ يقع في تاني شهر لان فروة الرأس مش بتستحمل كميه الالتهاب اللي فيها والموضوع بيوصل لاكزيما في فروة الرأس مش بس كده... ده بيشيل كل طبقه الدهون اللي موجوده في فروة الرأس بتكون النتيجه ان مسام الشعر بتتفتح كلها وده اكبر غلط لان مينفعش المسام تكون مفتوحه كده لان الفروة هتمتص اي حاجه هتيجي عليها وده غلط، كمان بعد الشر عننا جميعا ممكن يجيب سرطان في فروة الرأس".
وواصلت الطبيبة :"لو انتي من الناس اللي بيجيلها حساسيه من روائح معينه ف ريحه الجاز ده هتجيبلك حساسيه وتحسي انك مش قادرة تاخدي نفسك خالص، ياريت نخللي بالنا كده ومنجيبش اي حاجه لمجرد ان بيتقال عنها أنها بتنعم وتطول الشعر وبيتم التسويق ليها وبس واطفالنا بلاش ي جماعه حرام تبهدلوهم بحاجه زي دي. ياريت نخللي بالنا ومش نمشي ورا اي حاجه غلط ! ".
