أعلنت الفنانة نشوى مصطفى تنازلها عن قضية اتهام بعض الأشخاص بالتحرش بابنتها أثناء قيادتها على كوبري المنصورية- الهرم بالجيزة برفقة زوجها واثنين من صديقاتها السبت الماضي.
وكتبت على حسابها عبر "فيسبوك": "يوم طويل في نهاية اليوم أحب أقدم كل الشكر والامتنان للنائب العام ولرئيس نيابة الهرم ووكيل نيابة الهرم.
وأضافت "بلدنا عظيمة بشرفائها وشكرًا جزيلًا وزارة الداخلية، إحنا مسنودين عليكم والله كتر ألف خيركم، بالمناسبة الطرق الجديدة والكاميرات اللي في كل مكان على الطرق والملصق الإلكتروني، اكتشفت بالبرهان أنهم مش بس علشان يرصدوا مخالفات السرعة".
واستطردت "الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل، ومفيش أي فرصة لأى بلطجة، بسبب العظمة اللي الطرق بقت عليها، الحمد لله تم القبض على العربية باللي كانوا فيها فى أقل من أربع ساعات".
واستكملت "للأسف كلهم سنهم صغير، الهدف اتحقق أنهم هما وغيرهم عرفوا إن مصر اختلفت وكله متسجل، وأن عندنا عنين صاحية بتحمينا ومحدش فوق القانون، يمكن آخر سطر ده يزعل بعض الناس اللي طلبو مني إني استمر في القضية، حرصا على أمهات وأسر المتهمين وانهيارهم بأن ولادهم يتسجنوا، أنا وابتغاء مرضاة الله تنازلت عن القضية عملًا بمبدأ العفو عند المقدرة، ربنا يهديهم، واللي طلبتوا من أهاليهم وهما بيعتذروا لبنتي أنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هي خمس سنوات طبقا لقانون التحرش اللي أمر بتعديله سيادة الرئيس حفاظا على حق بناتنا".
وأضافت "حاجة تانية مهمة مكنتش اعرفها، أنا بالمناسبة معملتش محضر، أنا بس كتبت بوست هنا، واللي اتحرك بالنيابة عنى كمواطنة مصرية، إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا، وبيهتموا بأي مشكلة يكتبها اي مواطن وليهم ارقام تليفون، نقدر نتواصل معاهم وهما اللي بيقوموا باخطار النيابات المختصة نيابة عن اى مواطن تعرض لمشكلة.
واختتمت "على فكرة أنا اتنازلت عن الجزء اللي يخصنا لكن حق الدولة مش من حقى اتنازل عنه وهما عندهم مخالفات كتير، وتحيا مصر من كل قلبي".
وكانت نشوى مصطفى قد كشفت عن تعرض ابنتها للتحرش من إحدى عربات النقل على كوبري باتجاه المنصورية في أثناء قيادتها سيارتها.
ونشرت "مصطفى" صورة للسيارة عبر صفحتها على "فيسبوك"، وعلقت: "النهاردة بنتي اتعرضت للتحرش من العربية دي وفضل يزنقوا عليها واترهبت وهي سايقة على كوبرى ناحية الهرم المنصورية وكلمتني وهي مفزوعة قلت لها حاولي تصوريهم وعملوا لها إشارات سافلة زي ما هو فى الصورة كده".
وتابعت: "الحمد لله ربنا ستر وبنتي موقعتش من على الكوبري وهي مرعوبة من حجم العربية اللوري اللي بترهبها حسبي الله ونعم الوكيل فيهم".