تستضيف مكتبة البلد، غدا الخميس في تمام الساعة السابعة مساء، حفل توقيع كتاب "سنة أولى نفسية" للكاتبة شيماء الجمّال، والصادر عن دار الكرمة للنشر والتوزيع، ويناقشها الكاتبة "ليلى سامي" .

تقول المؤلفة شيماء الجمال في تقديم هذا الكتاب: سنة أولى نفسية كتاب هيساعدك تفهم ذاتك وتصاحبها، وتحب جسمك، وتحترم نفسك جوه علاقاتك.

في سنة 2016 اتشخصت باضطراب وجداني ثنائي القطب، ومن يومها حياتي اتغيرت، ومن يومها وأنا باقرأ بشكل مكثف في الصحة النفسية، وباحضر جلسات علاج نفسي، فردية وجماعية، بشكل منتظم، وباكتب كل اللي باتعلِّمه فيها، وبدأت من سنتين الدراسة المتخصصة.

في أول الرحلة كنت متلخبطة، وكانت الكتب النفسية العلمية معقدة عليا وصعبة، وكان نفسي أقرأ كتب بسيطة تاخدني في رحلة فهم الذات والعلاقات. وبعد ما مشيت خمس سنين كاملة في الكتابة والدراسة قررت إني أحاول أقدِّم الكتاب ده؛ كتاب يساعد كل شخص يبدأ المشوار، كتاب ينوَّر شوية مفاهيم صعبة ويوصَّلها بشكل بسيط للي لسه بيبدأوا طريق الوعي النفسي.

الكتاب دا ليك لو لسه بادئ رحلة البحث عن الذات، لو لسه بتدوَّر على نفسك وعايز تقف على أرض صلبة.. علشان كده اسمه سنة أولى نفسية.

شيماء الجمَّال كاتبة ومدوِّنة مصرية، مهتمة بمجال الصحة النفسية، وباحثة في مجال العلاقات العاطفية والإنسانية.

عملت شيماء سنوات عديدة مع الأطفال الصغار، وفي مجال الصحافة وإعداد البرامج التلفزيونية وصناعة المحتوى. أسَّست في عام 2011 مشروع أنا حامل - نادي الحوامل والأمهات الجُدد، وهي أول منصة إلكترونية ومجتمع افتراضي مخصص للحوامل والأمهات الجُدد في مصر.

صدر لها عدة كتب ناجحة مثل: أنا حامل: دليل المرأة الحامل، وحتة مني: كتابات عن الحياة والعلاقات، والبسكوتة والدحلاب: لما الحب يوجعِك وما تعرفيش ليه.