شاركت الفنانة لقاء الخميسي، جمهورها، صورة جديدة من أحدث ظهور لها، عبر حسابها على موقع التواصل الاجتماعي "إنستجرام".

وعلقت لقاء الخميسي قائلة: "2021سنة العوض.. ساعات كتير افكارنا بتاخدنا لأبعد ما كنا نتخيل ، وبنكتئب ونقرر نقفل على نفسنا مع الاشخاص القريبين اوي لينا واللي هايفهمو الحالة اللي احنا فيها ، ودا بيبقى صحي جداً ، وبتبقى فرصة لاكتشاف الذات.. وبيجي الوقت المُحدد بعد مراجعة النفس والاستلاهام بنبقى فيه جاهزين انسانياً وروحانياً".

وتابعت لقاء الخميسي: "وبيحصل حالة توحد مع النفس والذات وبنعيش احساس اننا مسامحين كل اللي اذانا ومتعاطفين معاه لكونه جواه نقوصات مش عارف يتخلص منها نتاج كل اللي مر بيه من مفارقات ماخترهاش او اخترها، بعد مروري بالمرحلة الصعبه جدا دي واللي خدت مني بحث كتير كانت النتيجة اني وصلت لمرحلة "السلام النفسي " بمساعدة شريكى في الحياة وتحمله للوقت الصعب دا ومساعدة انسانه جميلة بعتها لي ربنا في الوقت المناسب هنا رضوان".

وأضافت لقاء الخميسي: "وصولي للمرحله دي نور لي الطريق وشفت الدنيا احلى وبقيت اشوف بس الحاجة الحلوة واشكر ربنا عليها وارجع احلم تاني وثقتي في نفسي تكبر لان ثقتي في الطريق والرحلة رجعت ليا بقوة، رجعت احبني بعمق واثق فيا واخترت مين يستاهل يكمل الرحلة معايا ومين يخرج منها، كسبت ناس في ٢٠٢١ تستاهل الحُب والود واستغنيت عن ناس مش عايزاها تكمل معايا الطريق، وحلمت واشتغلت على حلمي ونجحت وفرحت وبكيت من الفرحة، والأهم مش بس اني وقفت على رجلي تاني "انسانيا " لاء ، الأهم اني اعترفت لنفسي اني باحبها بكل مافيها وعليها".

وأختتمت لقاء الخميسي: "انا لقاء باحب لقاء.. ودي اهم لحظة لازم نوصلها في حياتنا.. حب نفسك الكون كله يحبك ويعمل المستحيل انك تنجح.. وعرفت برده ان كلنا حتة من القمر.. باحبكم جدا وبادعوكم ل مراجعة النفس وحبها.. وباتمنالكم سنة سعيده مليانة صبر ورضا ومحبه وراحة بال وصحة".

يُذكر أن آخر أعمال لقاء الخميسي مشاركتها في مسلسل  "سكر زيادة" من تأليف أمين جمال، وإخراج وائل إحسان بطولة نبيلة عبيد، نادية الجندي، الفنانة القديرة سميحة أيوب، هالة فاخر، بالإضافة لعدد كبير من النجوم الذين يظهرون كضيوف شرف منهم أحمد السقا، بيومي فؤاد، جومانا مراد، روجينا، عبد الباسط حمودة، حمدي الميرغني، صبري فواز، سليمان عيد، وبدرية طلبه .