طرحت الفنانة ساندي، أحدث أغانيه بعنوان «في اللالا لالا» على طريقة الفيديو كليب، عبر قناتها الرسمية بموقع نشر الفيديوهات العالمي «يوتيوب».
«في اللالا لالا» من كلمات كلمات شادي نور، وألحان محمد يحيى، وميكس وإتقان ماهر صلاح، وتصوير وإخراج مروان عبد ربه.
وأثيرت حالة من الجدل خلال الفترة الماضية بسبب حذف أغنية «الهشك بشك» للفنانة روبي من موقع يوتيوب، بسبب بلاغ قدمه المنتج وليد منصور، الذي انتهى من تصوير الأغنية التي انتقلت إلى الفنانة ساندي.
وعلّق الشاعر شادي نور على الأزمة، ونفى وقوع خلاف بين روبي وساندي، وكتب بيانًا عبر «فيسبوك»، قال فيه: «الموضوع ببساطة إن الأغنية فعلًا كانت أغنية روبي ولما اترفضت من المصنفات اتعطل نزولها وألبوم روبي نزل، فالأغنية خدت كذا مسار تاني، وده بيحصل كتير طبيعي في أغاني كتير حتى لو مفيش مشكلة، المهم بدأنا نشوف الأنسب للأغنية وبالنسبة لي كنت بعمل كل المحاولات مع المصنفات اللي كان خلاصتها، أن الأغنية دي حلها الوحيد تنزل في فيلم علشان يتوافق عليها، وفضل الموضوع معلق وزي ما قلت بناخد مسارات كتير بالأغنية، وفي الآخر سبحان الله حصل والأسباب اتسببت أن الأغنية هتبقى أغنية فيلم وترجع لروبي برضو.. قلت سبحان الله والحمد لله، رفضوها برضو، فرجعنا لنقطة الصفر تاني وعشان ماطولش فضلت في محاولاتي مع المصنفات زي ما وضحت في بوست قبل كدة عن مشكلتي معاهم بخصوص الأغنية دي».
وأضاف: «وهنا حصل سوء تفاهم وأنا فهمت حاجة غلط واتصرفت على أساسها، وده اللي أدى أن الأغنية تنزل بصوت روبي وتتشال تاني.. وملخص كلامي ده أن كلنا أصحاب وحبايب مفيش خلاف بين روبي وساندي، مفيش أغنية اتباعت مرتين، وماحدش سرب الأغنية نكاية في حد، أنا وساندي مش محتاج أقول عن غلاوتها عندي وبدايتي وأحلى أغاني كانوا معاها ومبسووط أن بعد اللفة دي ساندي اللي تغني الأغنية».
وختم: «والملحن الكبير محمد يحيى ده حبيبي وأخويا الكبير وشريك أحلى أغاني ونجاحات ودايماً مع بعض يا رب، المنتج الفنان اللي بحبه وبحب دماغه وليد منصور دة حبييبي ومافيش بينا غير كل حاجة حلوة وان شاء الله احلى شغل روبي دي حبييبت الكل وأكتر فنانة بحبها وملهاش ذنب فحاجة و‘ن شاء الله تتعوض ونعمل مع بعض قنبلة قريب».