كشفت الفنانة المعتزلة جيني، زوجة الشاعر أمير طعيمة، عن تفاصيل حالتها الصحية بعد إصابتها بمرض في الشهور الأخيرة.

وكتبت عبر "فيسبوك": "من حوالي سنة ويمكن أكتر وأنا تعبانة وبأجل مشوار الطبيب، وبقول بطلي دلع وباخد مسكنات والدنيا ماشية، من تقريبا كدة 4 شهور وتدهور رهيب ومتماسكة وبقول أفضى بس كدة وأشوف إيه الحكاية، أمير كان عنده عرض المسرحية في الرياض والمفروض أنا ما بفوتش الحاجات دي إطلاقا وخصوصًا لو شغل شهور".

وأضافت: "المهم جه وقت العرض وأنا تعبت وما قدرتش أسافر وكان صعب عليا بس تعبانة مفيش طاقة مفيش نفس صحة تماما، الجسم كله مأذي لدرجة إني مش فاهمة أنا إيه إللي بيجرى لدرجة إني كلمت الطبيب الخاص وأخدت ميعاد وكنت في العربية قبل ما العيادة تفت، كشفت والصدمة إيه ده يا مدام؟.. هو حضرتك إزاي عايشة كدة؟.. وتفاصيل كتير في الكشف وقالي محتاج جراحة بس محتاج الأشعة والتحاليل دي وحالا أدركت إني فعلا في حتة مش تمام، ومن فحوصات الأشعة الكلام اختلف".

وتابعت: "4 أطباء من جامعة عين شمس والقاهرة وطب الأزهر عشان دقة الجراحة، كل واحد كان بيبعت لزميله الأهم التشخيص ويقولي معلش ناخد رأي شيخنا ومعلمنا الدكتور فلان أفضل لسلامتك، اصبري وتحملي، كان المفترض ده وقت الجراحة اكتشفنا إنه ورم وحجمه كبير، بس حقيقي وبأمانة محدش سابني لحظة ولا أستعجل ولا حاول يحطني تحت ريسك مع إنه طبيعي يحدث".

وختمت: "وبكل أمانة ما كانش بيتقال غير دي بنتنا وعايزين نحافظ عليها، الحمد لله النتيجة النهائية إني بخير، بشكر كل إيد من الأيدي الطيبة اللي ساعدتني وصبرت عليا بعرف إن ربنا بيحبني من المواقف دي مش من أي حاجة تانية، وأكتر كلمتين بيطمنوني من الناس البسيطة اللي بتقولي اوعي تخافي ربنا هيجبر بخاطرك عشان إنتي مفيش حد بتزعليه أبدً".