تحدثت الفنانة حورية فرغلي، عن تفاصيل رحلتها العلاجية، خلال لقائها في برنامج " كلمة أخيرة " الذى تقدمه الإعلامية لميس الحديدي، على شاشة "ON" قائلة: "إنها أجرت نحو 17 عملية، وهذا الأمر كان مرهقا جدا بالنسبة لها".
وأضافت حورية فرغلي: "رحت في الأول كنت فاكرة إنها عملية واحدة، لكن فوجئت إن الطبيب قالي أربع عمليات وهتقعدي معانا أربع شهور، وبين كل عملية والتانية ثلاثة أسابيع ومدة كل عملية 12 ساعة".
وتابعت: "الموضوع كان مرهق جدا جدا وكنت بعمل العمليات في شيكاغو عند طبيب من أمهر الأطباء..مكنتش عارفة أنا باكل إيه بقالي أربع سنوات مكنتش بشم أي برفان وكنت بشتريها لو العبوة شكلها حلو من غير ما أعرف ريحتها".
وأردفت: "مكنش هاممني شكلي قد ماكنت عاوزة أعيش، عاوزة أعيش وأشم الروايح وأستطعم الأكل وآخر حاجة كنت بفكر فيها إن شكلي يبقى حلو، كنت فقدت الثقة في نفسي وحاطة فويل (ورق القصدير) على جميع المرايات عشان مابصش لنفسي خالص لمدة عامين وكنت أعاني من الاكتئاب".
واستكملت حورية: "الهوليلة اللي كانت حواليا اختفت بمجرد سقوطي سواء اللي عاشروني 10 أو 15 سنة، أو اللي ساعدتهم على الزواج ووقفت جنبهم، كلهم اختفوا لما وقعت".
وأضافت: "كنت فقدت الثقة في نفسي وحسيت إني وحيدة، كنت معنديش علاقة عاطفية وعايشة لوحدي وكل حاجة اتقفلت في وشي، وكنت بتمنى الموت وبقول لنفسي: واحدة زيي عايشة ليه؟".