كشف الفنان مدحت إسماعيل، والشهير بـ«مدحت تيخا»، عن مشاركته في فيلم «بحبك»، والذي يعد التجربة الإخراجية الأولى للفنان والمطرب تامر حسني .
وأعرب مدحت تيخا عن سعادته لانضمامه لأسرة الفيلم.
وشارك تيخا منذ قليل، صورًا له مع تامر حسني من كواليس الفيلم عبر«فيسبوك»، وكتب: «طبعًا أنا مش عارف أكتب إيه ولا إيه عن النجم العسل الجميل ده.. على المستوى الشخصي،..أخلاق ورُقي وأدب وخفة دم مفيش زيها، وطبعا نجم الجيل، وأهم نجم في الوطن العربي كله، وأحلى صوت في الدنيا».
وأضاف: «بس أنا هكتب عن حاجة جديدة عنه وهي تامر حسني (المخرج) لاقيت مخرج شاطر جدًا مجتهد متمكن، فاهم كويس جدا، بيعمل إيه مهتم بتفاصيل كل شيئ، وكأنه مخرج من زمان، الحمد لله وبشكرك يا تامر إنك وثقت فيّ.
وتابع: « فيلم (بحبك) تأليف وإخراج وبطولة السوبر ميجا ستار تامر حسني والنجمة القمر هنا الزاهد»، والعسل اللي بيموتني ضحك حمدي الميرغني والعبد لله مدحت إسماعيل».
واختتم: « بسم الله ما شاء الله لا قوة إلا بالله.. بإذن الله نجاح محدش شافه قبل كدة.. يارب».
تامر حسني يبدأ تصوير «بحبك»
كان تامر حسني قد أعلن أمس بدء تصوير فيلمه الجديد «بحبك»، مشيرًا إلى أنه يدور في إطار كوميدي رومانسي، ومن إنتاج سينرچي، تي ايتش برودكشن، سكاي ليميت، ويشارك في البطولة هنا الزاهد، حمدي الميرغني.
ونشر تامر حسني، مجموعة صور من كواليس تصوير أول يومين من العمل، عبر حسابه على «إنستجرام»، وعلق قائلًا: «مساء الهنا على أغلى ناس على قلبي أنا.. دي صور من أول يومين تصوير لفيلمنا الجديد ( بحبك) طبعًا في ناس هتقرااسم الفيلم بحبِك، وناس هتقراه بحبَك دا طبعًا مقصود عشان في دراما الفيلم، هنبحث طول الوقت عن مدى صدق كلمة بحبِك، من الرجل للأنثى وبحبَك من الأنثى للرجل في أحداث فعلًا محيره جدًا».
رومانسي كوميدي
وتابع: «الفيلم أكيد فيه ضحك بس في إطار رومانسي بحت مش موجود بقاله كتير، اتشرفت بمشاركة نجمة اليوم والمستقبل الجميلة هنا الزاهد، ومبسوط أني اول من اكتشفها في بداية حياتها وفي الفيلم دا، بكتشفها تاني وبقدمها بشكل جديد عليها وعليكم ومبسوط جدًا، لمشاركة حبيب قلبي نجم الكوميديا الكبير حمدي المرغني اللي هيعمل إن شاء الله شغل رهيب في الفيلم كعادته الجميلة».
وأضاف: «وللأسف لسه مصورش علشان انزل صوره بس في اول يوم تصوير له ههريه صور، وانتظروا بعد أيام انضمام نجمه جميلة مميزة من نجوم المستقبل،اللي هيكون ليها مستقبل كبير إن شاء الله، و فرحان جداً بإنضمام الفنان الموهوب أوي مدحت إسماعيل اللي عامل دور زي العسل وربنا يكتبله فيه كل النجاح ويكرمه ويكرمنا معاه..الفيلم من إنتاج حبايب قلبي وأصدقاء العمر،سينرچي أحمد بدوي/ تي ايتش برودكشن حسام حسني ، سكاي ليميت أحمد الدسوقي».
يذكر أن أخر أعمال تامر حسني في السينما كان فيلم «مش أنا»، والذي حقق نجاحًا كبيرًا، ونال إعجاب الجمهور، من بطولة: تامر حسني، حلا شيحة، ماجد الكدواني، حجاج عبد العظيم، سوسن بدر، عصام السقا، محمد الجوهري، ومن تأليف تامر حسني، وإخراج سارة وفيق.