بقلم – أحمد سعيد
تبقي دائما حوارات السندريللا سعاد حسني مثيرة للاهتمام في الوطن العربي كله نظرا لما تتمتع به من شعبية كبيرة جدا وحياة مليئة بالمخاطر..
وكلما عثر علي تسجيل أو حوار نادر لها كان ذلك كاشفا للمزيد من الأسرار والحكايات في حياتها لما عرف عن صراحتها وجرأتها في الحديث..
وفي الحوار التالي الذي أجراه مذيع كويتي قدمت سعاد حسني رسالة خاصة للشعب الكويتي كما كشفت عن السر في عدم تقديمها لأعمال مسرحية رغم أنها ذكرت أن بدايتها كانت من خلال المسرح وهو ما يخالف ما هو معروف عنها من أن بدايتها كانت من خلال فيلم حسن ونعيمة.
كما صرحت بالمزيد والمزيد من المفاجآت في هذا التسجيل النادر:
المذيع:
مساء الخير الليلة ضيفتنا هي الفنانة المتألقة سعاد حسني.. مساء الخير ياسعاد.
سعاد:
مساء الخير
المذيع:
فرصة سعيدة إني ألتقي بيكي
سعاد:
أنا الأسعد
المذيع:
الحقيقة يمكن السؤال التقليدي اللي دايما بيسألوه في أي لقاء لفنان معروف هي بداية دخوله لعالم الفن والأستاذ عبدالرحمن الخميسى كتب قصة اكتشافك نحب نسمعها منك.
سعاد:
الأستاذ عبدالرحمن الخميسى هو اللي اكتشفني وكانوا بيعملوا حلقات للإذاعة اسمها «حسن ونعيمة» وفكروا يعملوها سينما مع الأستاذ هنري بركات...
والأستاذ محمد عبدالوهاب اللي كانوا عاملين شركة مع بعض وقالوا إحنا عايزين وجوه جديدة يعملوا فيلم «حسن ونعيمة» علشان الناس تصدق إن دول بنت وولد جايين من الريف مش ممثلين معروفين.. والحقيقة الأستاذ عبدالرحمن صديق للعائلة وأنا كنت صغيرة ومش باين عليا إني أعرف أمثل ولا حاجة لكن هو اللي قالي إنتي ممكن تنفعي.
وخدني علي الاستديو وقدمني للأستاذ بركات وكانت دي أول حاجة أعملها في السينما وقبل السينما أنا ابتديت في المسرح شوية «علي سبيل الهواية» وهي إني كنت باروح اتفرج وبرضه مع الأستاذ عبدالرحمن وكان بيعمل أيامها مسرحية «هاملت» ومسرحية «الأرض» وكنت باحضر البروفات واعطاني دور البطولة لكن ما تعملتش المسرحيات دي ولم تظهر للناس وكان أول حاجة أعملها هو دور «حسن ونعيمة».
المذيع:
مدام سعاد حضرتك قلتي إن بدايتك كانت مع المسرح لكن اللي شوفناه بعد اشتغالك في السينما هو إنك ما اتعاملتيش مع المسرح ولا حتي التليفزيون أحب أعرف هل هو حب كبير للشاشة.. أم تخصص؟ إحنا بنشوف فنانين كتير بينتشروا في المسرح والسينما والتليفزيون وحضرتك سينما بس إيه رأيك؟
سعاد:
أنا شايفة إن أحسن للنجمة السينمائية أنها تبقي في المجال بتاعها.. اللي هو السينما وبس.. يعني ما بفضلش أبقي منتشرة كتير زي ما حضرتك قلت.
ومن أول ما طلع التليفزيون قالوا لي كتير أشتغل فيه وأنا كنت حاسة إن الأفضل أني أشتغل في السينما.. وبعدين كمان الوقت ما بيكفيش إن الواحد يعمل كل حاجة كويس وأنا لو اشتغلت في التليفزيون والمسرح مش هاقدم حاجة كويسة علشان كده احب أن الوقت اللي أديه للمسرح أديه للسينما في إني أدور علي موضوع كويس وألاقي فكرة وأتقن العمل.
المذيع:
مدام سعاد بعد هذا التألق الرائع علي الشاشة إيه الشيء الجديد اللي تحبين أنك تقدمينه غير الأدوار اللي قدمتيها حتي الآن؟
سعاد:
الجديد إني أحب أقدم مستوي كويس باستمرار مع التطور اللي ماشي في العالم كله يعني ما امشيش علي الطريقة التقليدية في الفن وفي الأفكار.. لازم يكون فيه شيء جديد يخاطب الناس لازم الفيلم يكون له قيمة ويكون له هدف معين يقوم به فالجديد اللي اتمناه إننا نقدر نقدم الفن الرفيع الجميل وفي نفس الوقت اللي يوصل للجماهير.
المذيع:
أو نقول نقدم السينما العربية للعالم إن العالم قاعد يقدم لنا أفلامه؟
سعاد:
دي كمان نقطة تانية ومهمة وأنا مهتمة برضه يكون فيه أفلام مخصوص «للمهرجانات» أصل أفلام المهرجانات لها مطالب مختلفة عن الأفلام اللي بنعملها لبلادنا - لأنه ممكن التعلم يفوز بجائزة في مهرجان والناس ما تتبسطش منه ولا في مصر ولا فى أي بلد عربي لكن أنا نفسي الأفلام دي تبقي مخصوصة للمهرجانات علشان يبقي لينا مكانة عالمية.
المذيع:
عايز أخد رأيك في نقطة معينة إحنا في السينما العربية اللي بترأسها مصر غير منتشرين عالميا زي ما السينما العالمية موجودة عندنا في البلاد العربية ودي حقيقة واقعنا؟
سعاد:
طبعاً
المذيع:
لكن ظهور فنان عربي بالخارج أثبت أن فيه فن عربي حقيقي زي الفنان عمر الشريف مثلا.. فإيه رأيك بالنسبة لهذه النقطة خاصة إنك أنتي لكي مكانة في السينما العربية وخطوات ملحوظة فإيه رأيك اننا نعمل فن عربي نطلع بيه بره حدودنا العربية.
المشكلة في القصة مثلا تكون مشتركة مع أجانب وإلا المخرج يكون أجنبي لأن بصراحة أكثر أفلامنا يامدام سعاد البطل والبطلة بيحبوا بعض وبعدين بيحصل خلاف وفي النهاية بيتجوزوا رأيك إيه؟
سعاد:
اللي أشوفه إن لازم الدولة تبقي متحمسة للفكرة دي علشان هتتحمل مسئوليتها يعني يجيبوا أحسن ناس من المخرجين ومصورين وكدا وكل العناصر الجيدة بحيث نقدر نقدم شيء له قيمة ويكون الهدف أن الفيلم يشترك في المهرجانات علشان ياخد جايزة وبعدين ممكن كمان حاجة تانية إننا نستعين مثلا بنجم أو نجمة عالمية ليها اسمها الكبير ولو أن دي ناحية تجارية ونقدر عن طريقهم نسوق للفيلم بس طبعا لازم يكون مستوي الفيلم متميز لكن عموما الاهتمام دلوقت أكثر بالأفلام الموجهة لمصر والدول العربية.
المذيع:
نشكرك مدام سعاد ونتمني أننا نلتقي بيكي بإذن الله في فرص قادمة ونقدر نشوفك في فيلم مشترك سواء بين القاهرة وبلد عربي أو علي نطاق عالمي تحياتي.
سعاد:
إن شاء الله ... ومرسي جداً.. لكن قبل ما أختم اسمحي لي أحيي الشعب الكويتي الشقيق.. وأقول لهم صحيح أنا ما روحتش الكويت قبل كده ونفسي أجي واشوفهم وأزورهم عن قرب لأن فيه علاقة روحانية كبيرة جدا بيني وبين شعب الكويت باستمرار بيبعتوا لي جوابات وبأرد عليهم وكمان أختي عايشة في الكويت وبالمناسبة دي أحب أسلم عليها وعلي أولادها وزوجها وأقبلهم وأحيي شعب الكويت كله.
المذيع:
مرسي يامدام سعاد وإن شاء الله هاتوصل رسالتك للشعب الكويتي كله.