أعلن الفنان شريف إدريس، اليوم، اعتزاله الفن، بعد معاناة طويلة في الحصول على فرصة على حد وصفه.

 ونشر شريف إدريس عبر حسابه الشخصي على "فيسبوك" يوضح ما عاناه في مشواره الفني ، والذي تسبب فى اتخاذه قرار الاعتزال ، وكتب قائلا: "بعد 35 سنة سعي وتعب وشقي في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد.. وده قرار أخدته بعد ما الأمور وصلت في الوسط الفني لمرحلة عبثية وصلت اني بقيت بشوف بعض الزملاء بيشحتو الشغل علني علشان يشتغلوا لأن الشغل بقي متقسم علي ناس معينة.. فلو الأمور وصلت لكده أبعد أحسن.. وحتي لما بيجي شغل بيتفرض عليك توافق بأقل الفلوس وتخرج من الشغل مديون..ومواقف مهينة".

 وتابع: "هحكيلكم موقف حصل معايا من أسبوع.. اتصل بيا حد قالي عايزين حضرتك بكره عندك تصوير في مسلسل كذا بس هتدفع عشرة في المية للكاستينج دايريكتور..كان هيجيلي جلطة بعد ماقفلت المكالمة ووافقت علشان أنا محتاج اشتغل ومحتاج فلوس..وماقدرتش أستوعب الفكرة بصراحة إني بعد العمر ده مضطر أدفع علشان اشتغل فاتصلت واعتذرت…وده الحال حاليا إن الأمور بقت في إيد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس .. فطالما الشغل بقي لازم يتدفعله..وطالما الشغل بقي بالشحاته..يبقي بلاش أحسن".

وأضاف: أنا طول عمري راضي الحمد لله.. بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحله نفسية ومادية إني بقيت مش قادر أربيهم ولا أصرف عليهم وأنا عندي تلات أطفال بعبدهم عبادة متخيلين حجم المسؤولية..وبقيت مديون لطوب الأرض.

وأكد انه سيرفض أى عمل يعرض عليه بعد هذه المنشور قائلا: "حقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شئ.. همسح إبلكيشن فيسبوك من تليفوني لأني هنزل ابيع تليفوني أصلا.. فأنا هاكون متاح أونلاين لحد بالليل.. لو حد عنده فرصة شغل وسفر ليا ومش معاه رقمي ياريت يجيبه من أي حد".

 وأضاف: "ملحوظة: أنا مش محتاج طبطبة من حد أنا محتاج فرصة سفر وشغل تخليني أعيش ولادي حياة كريمة وبس، شكرا ليكم محبتي للجميع ..هاين عليا اقوم أرمي نفسي من البلكونه بعد ماوصلت اني أكتب البوست ده"

شريف إدريس بدأ العمل بالتمثيل وهو طفلاً، وكان بداية ظهوره في منتصف ثمانينات القرن العشرين بأعمال تلفزيونية وسينمائية، ومن أعماله السينمائية (الاتحاد النسائي، أسعد الله مساؤك، المفسدون)، ومن أعماله التلفزيونية ( أرابيسك في دور الطفل  أيمن ، على باب الوزير، عفاريت السيالة، الهروب).