وجه الفنان تامر حسني، رسالة دعم لطلاب وأساتذة الثانوية العامة، في الإسكندرية، متمنيًا لهم التوفيق والنجاح، عبر حسابه على موقع التواصل الاجتماعي "إنستجرام".

ونشر "حسني"، مقطع فيديو للطلاب يظهر محبتهم الشديدة له، وكتب تامر: "طلاب وأساتذة الثانوية العامة الإسكندرية، مش عارف أقولكوا قد إيه فرحت بكلامكوا وباللي شوفته في الڤيديو من محبة صادقة وتأثير صادق وحقيقي بينا، شكراً لكل طالب حس كلمة إيجابية مني وأثرت فيه سواء في كلامي أو أفلامي أو أغانيا".

وأضاف: "شكراً لكل مدرس حط رسايلي الصادقة ليكم في عين الإعتبار وخاطبكم بها، وحمداً لله إن علاقتنا مش مجرد فنان وجمهور لا دي أكبر من كدا بكتير ودي العلاقة اللي حلمت بيها من صغري، بقدر الإمكان بخرجلكم من رحلتي كل ماهو إيجابي ليكم من نصيحة أخ الى كلمه تحفيزية واللي جاي مني ليكم اكتر وأحلى بإذن الله وواثق إنه هيوصل قلوبكم عشان زي ما قولتلكوا زمان اللي بيطلع من القلب بيوصل للقلب".

وتابع: "شكراً شكراً طلاب إسكندرية وشعب إسكندرية العظيم شكراً شباب مصر ام الدنيا يارب.. كلكم ناجحين واللي عنده خطأ يصلحه الحياه لسه قدامكم و الوقت لسه في ايدكم اي صعب هيعدي و بكرا تنجحوا و تبقوا اصحاب قصص حياه جميله كل واحد فيكم لازم يبقى بطل في قصة حياته عشان كدا متزعلوش من اي صعب و اي اخطاء و اي فشل في اي اتجاه الحياه رحله و مشوار طويل مش موقف ولا موقفين".

وواصل: "والحل الوحيد اننا ننجح و نعتمد على نفسنا و تتعلموا انكم متسندوش على أشخاص عشان لو مشيوا متقعوش اسندوا على، اولاً ايمانكوا بربنا دا اهم و اقوى سند تاني حاجه اسندوا على حلمكم و مجهودكم و نجاحكم اسندوا على قوتكم انتوا و هقولهالكوا تاني احنا في زمن صعب لو احتاجت ايد تسندك وتدفيك امسك ايدك التانيه برغم ان في كتير طيبين بس الحياه تلاهي و اللي سندك مره مش هيسندك التانيه".

واستكلم: "وكمان جه دوركوا انكم تفرحوا اهاليكم و تكونوا انتوا سندهم عشان لما بيكبروا هما اللي قلوبهم بتتحول قلوب اطفال و بتحتاج رعايه منكم انتوا بيبقوا محتاجين انكم تردولهم اللي عملوه معاكم وانتوا صغيرين.. معلش طولت عليكم و عارف ان من سمات العصر انكم مش بتحبوا تقروا الكلام الكتير".

وختم تامر حسني: "بس أنا عارف كلامي رايح لمين رايح للّي محتاجينه و مستنيينه فا هيقروه كويس جداً.. عشان من كل قلبي لحبايب قلبي وإن شاء الله هشوفكوا قريب.. بالتوفيق يا أمل مصر".

 

 

 

 

View this post on Instagram

 

 

 

 

 

 

 

 

 

 

 

A post shared by Tamer Hosny (@tamerhosny)