«كل المحاولات فشلت».. ميما الشامي تُعلّق على أزمتها مع خالد عليش

كشفت الفنانة ميما شامي عن تفاصيل الأزمة بينها وبين طليقها الفنان خالد عليش، بعد الاتهامات الموجهة لها من قبله.

ونشرت ميما شامي عبر صفحتها الرسمية بموقع التواصل الاجتماعي "فيسبوك"، قائلة: "لو في حد محتاج توضيح أو هيفهم هي ميما.. للأسف عمري ما كنت هحكي لها حاجة وربنا الشاهد على قراري، كنت بحاول وكل المحاولات فشلت.. والطرق الودية مكنتش نافعة".

وأضافت ميما شامي: "أقسم بالله العظيم ده أتقلي واتقال لإخواتي وأصحابي قضية الرؤية أنا رفعتها عشان أكسرك بس أنتي مبتتكسريش.. هي الناس اللي بتهاجم وبتتكلم وبتقول مبروك.. أنا ياجماعة كنت مدياله أكتر من 11 ساعة وعشان فلوس اعترض على الاستضافة ويشهد ربنا عليا".

وتابعت ميما شامي: "وعمر ما البنت كملت معاه 8 ساعات وكان بيرجعها.. أنا بس عايزة أقول لكم إن الموضوع مليان تفاصيل كتير.. وكل كلامي مع الطرف الآخر مهما كان مين اللي غلط واللي بيعند بلاش التشهير بلاش نكتب للناس مش هنوصل لحل بلاش عشان ميما".

واستكملت: "على كلامك ربنا نصرك مع إني شايفة إنك كنت واحد أكتر من الحكم دة بالود.. اتبسط وأبعت أي كلام مؤذي ليا وللي حوليا وأعمل كل اللي أنت عايزه فيا بس في الآخر، ميما مش هتعرف بس لما الناس عرفت إيه الفكرة والله مش مستوعبة.

معنديش مشكلة برضو أن الناس تعرف بس ليه كلامنا في الموضوع دا حقنا إحنا التلاتة ليه تاخد قرار نيابة عنها وندخلها فيه.. ليهة في مدرستها والنادي من حق كل الناس توقفني تسألني عن صحة اللي بيتقال، ليه البنت تسمع كلام عن مامتها وباباها.. عشان حد فينا ينتصر.

طيب من وجهة نظركم اللي انتصر خلاص انتصر وبين وجهة نظره.. أنا أقدر اتكلم واطلع لايف وبرامج ومعايا الأدلة بس والله العظيم أنا مبفكرش في إني أبان صح..

أنا بفكر في بنت ملهاش ذنب من حقها كانت تعيش في سلام بنا  حتى لو حد فينا سيء.. مين الصح أو مين الغلط ربنا اللي يحكم مش الناس.. طبعًا أنا حاولت أقول الكلام دة للطرف التاني كتير.. أنا بعدت بعدت من زمان قوي وبعدت جدًا عن كل حاجة.. ومش عايزة انتصر ولا أكسب التعاطف يارب كل الناس تقول غلط بس  بعيد عن بنتي.. لو بأيدي دلوقتي أعمل أي حاجة عشان إسم بنتي ميبقاش متداول بالشكل دة كنت عملت رجاء وتوسل مني الناس مش عارفين أي حاجة..

قرار المحكمة ليس انتصار ومش ضد رغبتي بس للأسف أنت خسرت خسرت أنه مهما المشاكل كانت بنا كانت هتفضل بنا وكان ممكن يوم تتنسي ومتوصلش لبنتنا.. للاسف هتفضل البنت تدفع تمن شهرتك وتراندات اتعملت عليها..

أرجوكم التزموا الصمت عشان خاطرها مش عشاني.. أسفة مرة تانية.. أنا مش هعمل أي حوار مش هدي اي تصريح مش هطلع اي لايف ولو بايدي اعمل المستحيل عشان اشيل صور بنتي من الاخبار اللي نزلت عننا

بيتهيالي كدة كل حد كان نفسه في حاجة عملها وكل كان نفسه في حاجة قالها وكل اللي كان عايز يبان انه بيدعم بان كفاية بقى وكل واحد يشوف حاله وحياته وشغله ونفكر بعقل ازاي هتعدي البنت المحنة دة وتبقى سعيدة ومبسوطة مع كل اللي بيحبها وميضرهاش..

وربنا يكتب للجميع الخير ويهدي كل واحد غلط في حقها..

وأنهت حديثها قائلة: "تعديل تاني أنا مش هتناقش في أمور بنتي عالفيس بوك عشان الكومنت اللي اتكتب.. يا جماعة أقرو البوست وافهمو بقول كفاية نقوم  نتفق.. هيحصل أية في الكومنتات وأجي أمتى وأنا جاي بكرة.. لا حول ولا قوة الا بالله.. هو اللي بيحصل دة حقيقي ولا بيتهيالي.. تعديل أخير.. ورحمة ابويا ماهيكون عندي رد تاني مهما اتقال واتنشر صور وسكرينات لأن واضح ان مفيش فايدة وهتفضل نتكلم ونرد ونشير ومش هنوصل لخير أبدًا.. والله كل حاجة ليها رد وإثبات وكل كلمة بتتقال مش حقيقية سيباها لربنا يظهر الحق".