يسترجع الشاعربهاء الدين محمد ذكرياته مع الموسيقارالراحل حسن أبو السعود ، وأشاد به أنه كان من أفضل العازفين على الأوكرديون في العالم، وطلب من الفنانة شيرين عبد الوهاب الصمت.
كتب الشاعر بهاء الدين محمد منشورا على حسابه الشخصي بموقع التواصل الاجتماعى "الفيسبوك"، قائلا:"حبيبى اللى عمرى ما حسيت إنه مش ف الدنيا واللى كل الوسط بيحبه وكان وجوده ف أى مكان بيعمل حاله من البهجة بروحه الطيبة وقلبه اللى كله حب وفن ،الفنان اللى عملنا مع بعض نجاحات عايشه لحد النهاردة ،منها "أسف حبيبتى ،لما النسيم، فى ناس، أصعب حب ،وعدا الليل ،عمال يحكيلى عنها "،ومئات الأغانى اللى كان بخبرته ف اللايف بيعرف يجيب الجملة اللى الناس تحبها وبالفعل سيطرنا سنين على الساحة الغنائية وغيرنا كتير . ده غير أنه كان من أفضل العازفين على الأوكرديون ف العالم .
بهاء الدين محمد يكشف عن موقف بينه وبين الموسيقار حسن أبو السعود.
وكشف بهاء عن موقف له مع الراحل الموسيقار حسن أبو السعود قال:"و ف يوم من الأيام وهو نايم تعبان لقيته إبتسملى وسألنى أنت عارف مين أكتر حد ح يزعل عليا لما أموت ؟ قولتله إسم من أسماء ولاده ، قالى لأ أنت أكتر حد ح يزعل عليا وبالفعل أنا مابقيتش حتى أمشى من شارع بيته وفضلت فترة طويلة أنسى أنه مات لأنه عشرة فن وحياة ،وكان بيحبنى كأنى إبنه وكان بيفرحلى بكل نجاح حتى لو مش معاه وح أبقى أحكيلكم إزاى إتقابلنا لأن الموضوع ده مهم .
بهاء الدين محمد يعلق على أزمة شيرين عبد الوهاب مع الموسيقار حسن أبو السعود
علق بهاء على أزمة شيرين عبد الوهاب مع الموسيقار حسن أبوالسعود قائلا:"والمهم علشان أقول اللى ضميرى بيحسه ف موضوع شيرين عبدالوهاب واللى جهات كتير عايزنى أقول رأى ف كلامها عنه، او وصفها أنا بكل صراحه بأقول ماحستش إنها قاصده تهينه ولا تسخر منه، هى بس إستدعت سيرته بشكل يبدو ساخر لكن أنا رغم إنى متضايق منها وهو عندى من أغلى الناس إلا إن إحساسى قالى إنها ماتقصدش .لأن فعلا لما كنا بنتقابل كان بيحتفل بشيرين وبيحب فنها و البساطه اللى فيها وهى كانت بتحبه وتحترمه .
اختتم بهاء الدين محمد :"وللعلم أنا لما كنت بأروحله وشبعان ومش طايق أشوف أكل اول ما يقولى تاكل بأداء ماشوفتش زيه بألاقى نفسى بأجوع ،الله يرحمه كان فنان ودمه خفيف وقلبه قلب طفل ،بس هى غلطانه إنها بتطلع تتكلم !!!،ولو ليا سلطة عليها مش ح أخليها تنطق لا على مسرح ولا لقاء ولا حتى ف حياتها الشخصية.