تنشر بوابة دار الهلال، قصيدة جديدة للشاعرة مروة الشريف، بعنوان «العالم غول».
العالم غول
أنا جاي اتأسف للعالم على غلطاتي
على تفاهاتي
في فهم العالم والإنسان
الخوف... ده.. جبان
كان دايما يهرب يتخبى في بني الإنسان
كان دايما أضعف من إنه يواجهه
وهيواجهه ازاي
كان صعب يواجهه عشان كونه
نبتة ريحان
نبتة ريحان لسه بتبدأ
بتمد فروعها لشمس العالم والدنيا
لكن خانها
أجواء الطقس الخريفية
خلعته من جدره
بعزم مافيها
حدفته
على عالم مش ليها
علشان كده جاي يتأسفله
على كونه في عالم مش مثله...
.. أنا جاي اتأسف على كوني..
دخلت في كون
كان غير كوني
الكون في خيالي بريء جدا
حدوته الديك فيها بيدن
فتقوم البنوته وتبدأ
تفتح شبابيك حلمها للنور
وبتسقي ورود زارعاها ع السور
وترش عبيرها على الدنيا وعلى كل الناس
وبتمشي توزع
حب وطاقة
وإحساسها بإن الكون ده ربيع
فتقابل الكل بقلب وديع
لكن العالم بيواجه إحساسها الدافي..
بالشرا والبيع
تتفاجيء كونها لوحديها
صحراء جرداء
تتفجر من حواليها دموع
زي الينابيع
فبتبدأ تحكي وتتكلم
وبكل مافيها بتتألم
وتفضفض وتبوح بالأسرار
العالم ده كله يا سادة
عالم مسكون ببني الأشرار
هتقابل فيه كائن غدار
تحسبه في نقاء فنجان قهوة
فتقرب منه وتضحكله
تطمن تتفاجيء إنه
رقعك شلوت كده على سهوة..
..هتقابل فيه..
كائن شايف نفسه تملي
كده فوق الكل
من ركن بعيد آخر الدنيا
تلاقيه بيطل
..هتقابل فيه..
كائن وسواس
كاره للعالم والدنيا ولكل الناس
بيوزع طاقته السلبية
وبيشحن طاقته الداخلية
بكسور إحساس اللي يقرب..
ده ..اللي يقرب منه ياويله
يغرف م الكره ويديله
عمل اللي عليه
وزع سمه كتر خيره
خلص على كل اللي يقابله
في سكة سيره
..هتقابل فيه..
كائن هيبان إنه مسالم
دايما تلاقاه سارح حالم
راح يعزف لك حلم على جيتار
فتسلم تجري تشب لفوق
هوب على خوانة
كده تلاقاه
حدفك في النار
وكأن ما بينه وبينك تار
والخبط يزيد من كل الناس
وكأن العالم والدنيا
بقا محفل زار
..العالم غول..
أنيابه بتنهش بستاني
خلوني أصرخ جواني
عن كل خراب حاصل فيا
مين المسئول
ملقتش إجابة فقولت أقول
أنا أسف جدا للدنيا
على غلطاتي