تصدر الفنان حازم إيهاب محركات البحث "جوجل "خلال الساعات الماضية، ذلك بعدما حل ضيفا مع الإعلامية عبير بسيوني ، فى برنامج "رمادي"، وتحدث عن تفاصيل وفاة نجله يونس.

وكشف حازم إيهاب تفاصيل وفاة نجله الرضيع قائلا: "ابني كان متقدر له أو مكتوب له إنه هيجي يقعد معانا 13 يوما مكنتش بنام فيهم، وهيروح للي خلقه تاني، يعني ضمن الجنة كده من غير أي حاجة".

واستكمل: "إحنا عرفنا المشكلة ومنة حامل، في حد في أمريكا قالي إحنا عندنا هنا بنزله على طول، كانت في الشهر الخامس، يعني إحنا أول ما عرفنا إن هو ولد، عرفنا إن في غرفة من غرف القلب عنده مكنتش شغالة، فممكن نستنى شوية وقت وتشتغل،ا لأزهر أفتى لي إن إحنا ننزله، بس أنا مكنش عندي المنطق ده، لأ أنا اللي ربنا كاتبه لابني هيشوفه، أكيد ربنا مش هيبقى عايزه يتعذب، بس أنا مكنتش هعرف أسامح نفسي، ممكن بعد ما أنزله أرجع أطارد نفسي بعدها بكام شهر، أقول طيب أفرض كنت سيبته يكمل مش جايز كان ربنا حط فيه معجزة، وكانت هتفرق بيني وبين ربنا كتير أوي، يعني كانت هتحسسني إني مبقتش واثق فيه".

أضاف حازم: "لقيت تليفون جايلي أنه توفى يعني، روح بقى لف لفة تصاريح الدفن وحساب المستشفى، وطبعا من سذاجتي عشان أول مرة أكون في موقف زي ده روحت مكلم حد حجزلي قاعة عزاء وبعدين اكتشفت أنه الأطفال مبيكونش ليهم عزاء أصلا، وبرضو من سذاجتي باخد يونس وهو في الكفن ورايحين نصلي عليه، فإمام المسجد لقيته بيضحك وقالي يا حبيبي إحنا بنصلي على المتوفي عشان ربنا يخفف عنه ويرحمه وكده.. فإحنا بنصلي على ده ليه؟ ده إحنا نحاول نتمحك فيه بس كده عشان يدخلنا معاه الجنة، وراح واخده مني وحاطه مع نعش حد كان بيتصلى عليه برضو وروحنا مصليين عليه".