تصدرت الفنانة جيهان قمري محركات البحث "جوجل" خلال الساعات الماضية، وذلك عقب تصريحاتها الأخيرة عن مشاركتها في فيلم "عمارة يعقوبيان"بطولة الفنان عادل إمام.

وقالت جيهان قمري خلال استضافتها ببرنامج نص الكلام، الذي تقدمه الإعلامية راغدة شلهوب عبر شاشة قناة النهار: عادل إمام قال لي هقطعك بوس في عمارة يعقوبيان واستأذنت مراتي، وقبلها كنا معزومين عنده في البيت في رمضان وكان بيحاول يهديني علشان كنت متوترة جدًا لأنهم خوفوني منه وكل مشاهدي كانت معاه، وبعدين لقيته مختلف بيضحك وبيتكلم عادي معانا".

وتابعت:" الدور نجح جدًا ومش عارفة عملت الدور ده إزاي كنت سايبة نفسي خالص وكنت بتحرك بعينين عادل إمام، كنت حاسة إني بحلم، والتجربة رائعة وما اعتبرتش إن ده تنازل علشان أطلع مع عادل إمام مقابل إني اتباس، حتى لما الناس قالت اتباستي قلت عادي هو باسني من خدي ما عملش حاجة عيب ولا غلط، ولما قريت السيناريو ما كانش فيه حاجة أوفر وهو اللي اختارني وقال اسألوها لو توافق، التجربة كانت مميزة وخلتني في حتة تانية مع إني كنت معروفة وقدمت أدوار كتيرة لكن التجربة نقلتني خطوة للأمام.

وأضافت جيهان قمري:" كل شغلي ما كانش فيه حاجة أوفر، دي طبيعة فيا في حاجات كتير طبعي وبتصرف طبيعي، أنا دلوعة زيادة وغصب عني بيطلع ده في أدائي، وفي مشاهد لما عملت أدوار صعيدية تعبت علشان ابقى ناشفة، وده كان سببا في فشل استمرار أي علاقة، لأني بهتم بشغلي جدًا ومش بشوف حاجة تانية وبركز في شغلي جدًا وبحب اشتغل من قلبي، ممكن حتى صحابي يزعلوا مني حتى ماكنتش بشوف أهلي.