كشفت الفنانة نشوى مصطفى، عن موقف إنساني للفنان الراحل هشام سليم، مع ممثلة كبيرة في العمر، عبر حسابها الشخصي بموقع التواصل الاجتماعي "فيس بوك".

وكتبت نشوى مصطفى، خلال منشورها: "افتكرت حاجة عن هشام سليم يمكن مش كتير يعرفوها، في يوم راجعة من التصوير وكان فيه أستاذة ممثلة كبيرة الله يرحمها اسمها ثريا إبراهيم، قالت لي نشوى معنديش عربية توصليني في طريقك لأقرب مكان أنزل آخد تاكسي، قلت لها تاكسى إزاي هاوصل حضرتك لباب البيت".

وأضافت: "وإحنا ماشيين قالت لي عارفة الشقة اللي حتوصلينى ليها دي مين جابهالي، قلت لها مين؟، قالت لي شيريهان، وحكت لي أنها كانت بتشتغل معاها مسرحية شارع محمد علي، وكانت بتيجي كل يوم من طنطا للقاهرة وترجع تاني، لأن بيتها كان هناك ولما شريهان عرفت قالت لها شوفي الشقة اللي تحبيها وأنا هاشتريهالك، ولما اشترتها كانت فرحانة أوي".

وتابعت: "لما هشام عرف بارك لها وقال لها فرشتيها ولا لسه قالت له فرشتها قال لها كان نفسي افرشهالك، قالت له وهي بتهزر طيب ما تعمل حاجة تانية قال لها تحت أمرك، قالت له نفسي أحج، تاني يوم لقت شركة سياحة بتكلمها وبلغتها أن هشام دفع كامل التكلفة وكانت خمسين ألف جنيه، وكمان وهي رايحة عطاها مصروف الرحلة وقال لها ادعي لي، بس كده، ألف رحمة ونور".