علقت الإعلامية سهير جودة، على الشائعات حول رموز الفن، قائلة:« الشائعات عاوزة مننا ايه، مروجي الشائعات طول الوقت بيستهدفوا شخصيات مؤثرة وملهمة في حياتنا ولها جمهورها ووزنها وقيمتها، مش عارفة ليه الشائعات طول الوقت بتستهدف النجم عادل إمام بالأمس استهدفت الفنان صلاح السعدني».

وتساءلت سهير جودة في برنامجها الذي يحمل اسم «الستات» والمذاع عبر فضائية «النهار»، قائلة: « ما سبب الشائعات دي، مفيش احترام لحياة الناس ليه، الناس بتتجرأ على الموت نفسه مش بس على حياتهم، معقولة حتى جلال ورهبة الموت مبقتش موجودة عند الناس اللي بتنتج الشائعات دي بسبب وبدون سبب».

 وأضافت: «أحمد السعدني نفى امبارح شائعة وفاة والده، لكن الغريب أن أحد الشخصيات العامة هو من تداول الشائعة على صفحتة دون أن يتأكد من صحة الخبر، وبدأت الشائعة تنتشر، لذلك كان رد أحمد السعدني على الشائعة قاسٍ، حتى دعا على مروج الشائعة، وتعامل مع الأمر بكل عصبية لغضبه من ترويج تلك الشائعة».

وهاجمت سهير جودة مروجي الشائعات: «هتفيدك بإيه إن أنت تطلع شائعة أو تنشر خبر كاذب، ليه وإزاي نتكلم ونكتب من غير دقة ومناسبة، ليه عندنا شهوة الشائعات، مش دي الشخصية المصرية خالص، دي أبعد ما تكون عن اخلاقيات المصريين، وفكرة الشائعات دي من أسوء ما يكون، وده فعل غير أخلاقي ومشين، والمفروض القانون يحاسب عليه ، وربنا هيحاسبك عليه، احنا بقينا نستسهل فكرة الاشاعة ونصدقها او نشيرها، كفاكم قتلا بالشائعات».