للشاعر الكبير الراحل : سيد حجاب
وخليفة الله إبن أدم ...زيه زى الحمار ؟
بين "مول" و "مول" يرمح يشبرق عينيه
شارى دماغه وروشنه طحن نار
وليل نهار ..متنح ..سفيه
وعمره لحظة طيش ..وشرفه هزار
عايش حياة أغوات ..بأخلاق عبيد
يديها "بيج ماك" ..بيبسى ..شيبسى ..فشار
يحلم بـ "هيفا" ويصحى مهزوم وحيد !
يخش عالشاشات بشوق وإنبهار
ويعيش فى وهمه سعيد ..!
***
جاى الطوفان من فضل رب العباد
على الغلابة فى زمانا الضانيين
جاى يمحى من ساد بالفساد فى البلاد
ويمحى أحلام أهلنا العشمانين
ويحيى فى قلوبنا الحنين والعناد
جاى من دموع ناسنا العدالى البساط
أو شربتات ليلة فرح وانبساط
أو من براكين الأهات والأنين
جاى الطوفان جبار .. وحياخدكوا باط
وانتوا وعيالكو غرقانين ..غرقانين
جاى الطوفان ..جاى شايل الماضى
يكسح فى وشه الماضى والحاضر
فيه طيبة زادت هيبة القاضى
له نظرة النسر فى عيون "ناصر"
لنصر نصر الله اللى كان قاضى
وبشرنا بالمستقبل الناضر
جاى ..رمح ..رمح تقولش مش فاضى
يؤمر وأرض الله تقول :حاضر
وترضى حكمه ..ولا مش راضى
الأمر أمره وعزرائيل حاضر
وبكره للناظر
قريب ..بدون ما نقول ولا نصادر
سرح خيالى ف منام
شفت الطوفان جاء
وبوداعة وسلام
ورمى عليكو السلام
**
نلقى الشعوب بتنول...وتاخد حقها المستحق
ما اللي يستاهلوا الغرق والحرق
من حرموا عالخلق قولة لأ
بيصرخوا على طول بصوت مذلول
ويبصوا بغباوة وعته وذهول
لمصيرهم المجهول
وربنا إسمه الحق
وحسابكم معاه حيطول
والعمر -وإن طال- ياطوال العمر
مايدومش لا للبيض ولا للسمر
وبكرة كل المستخبي يبان
وتفوقوا من سكر الليالي الحمر
على الطوفان جاي في الميعاد غضبان
قاصدكو بالذات..عارف العنوان
يامرحبا.....
والله زمان يا طوفان