كشفت الفنانة علا غانم فى تصريحات إذاعية، عن تطورات أزمتها مع طليقها رجل الأعمال عبد العزيز حسن، مؤكدة أنها اتخذت أولى خطواتها في استرداد منزلها، مؤكدة أنها تمر بحالة غير مستقرة.

وأوضحت الفنانة علا غانم خلال حديثها قائلة: «أنا حساسة جدًا فيما يخص السوشيال ميديا، وكممثلة حريصة أن الجمهور ميشوفش مني غير كل حاجة حلوة أوي، ومبحبش أوصل للجمهور مشاكل لأن كل واحد عنده مشاكله، فبحب لما أطلع لجمهوري يكون في أخبار سعيدة».

واستكملت علا غانم حديثها: أنا حالياً بمر بمرحلة مش حلوة أبدًا، ومحاطة بـ أكاذيب وفيلم غريب وكل المشاكل اللي عندي دخلت للقضاء وواخدة خطوات في سكة سليمة، وثقتي في القضاء وفي نزاهة قضاء بلدي ثقة عمياء، ولكن الوقت طويل شوية بس الحمد لله خدت من حوالي أسبوع أولى خطواتي في استرداد بيتي.

وأضافت علا غانم: «كل حاجة اتاخدت مني بشكل إجرامى هترجعلى، و كل واحد عمل حاجة غلط لازم يتحاسب عليها، وأنا مقدرش أعرف حاجة اسمها انهيار وفشل ويأس لأنها مش فى قاموسى، دي كلمات بتقوينى وتحلينى أقول لنفسي لازم تقفي حتى لو هقع بعدين، بس كل حاجة لازم ترجعلي زي م كانت».

كما أردفت الفنانة علا غانم عن حديثها بعد نقد الجمهور قائلة: «أنا بشفق حقيقة على الجيل الجديد الصاعد، لأن الجحود اللي متفشي في نفسيتنا للآخر بيأثر فينا إحنا كنجوم كبار، ما بالك اللي لسة فى أول الطريق وبيحاول يقف على رجله ومحتاج دعم من النجوم والناس علشان يبقى عنده ثقة في نفسه».

وأشارت على غانم فى حديثها قائلة:« الولد اللي عمل دور ابني في فيلم أولاد حريم كريم، علشان لسة جديد كان مُهمل شوية في اللوكيشن، ومش واخد حقه، وكمان مش مهتمين بيه وبيجوا عليه في حاجات أنا بقيت أعدل ده ومش عايزه حد يأذيه نفسيًا، أنا بفتكر اللي حصل معانا وإحنا صغيرين فبيصعب عليا أشوف حد لسة أول مرة يقف قدام الكاميرا وكلهم ضده، طب طيب جبتوه ليه؟ ولا دي شحنة داخلية بنخرجها يعني؟ لازم نراعى النقطة دى لأننا مرينا بيها وكنا وقتها فعلاً محتاجينها».