أكد فوزي الحناوي لاعب الاتحاد السكندري، أنه مر بواحد من أسوأ مواسمه في الموسم الحالي، مشيرا إلى أنه يعاني من الاكتئاب.
وكتب اللاعب تفاصيل ما جرى له عبر حسابه بموقع التواصل الاجتماعي فيس بوك: "السلام عليكم ورحمة الله وبركاته.. معرفش الكلام ده هيضيع مستقبلي في الكوره ولا لا بعد انهارده بس لازم ابرء نفسي من كل دقيقة عدت عليا السنادي قدام ربنا مستفدتش بيها ولا النادي استفاد مني بيها".
وأضاف: "أنا أول حاجة / بشكر رئيس النادي محمد مصيلحي على كل حاجه حصلت منه في السنين اللي عيشتها في نادي الاتحاد عمره ما أخر علينا جنيه ودايما شايل النادي على كتفه، تاني حاجه /بشكر جمهور الاتحاد اللي كان بيحبني واللي كان بيشتم فيا الكورة مش دايما حلوه ومش دايما وحشه بس فيه كواليس مفيش حد بيعشها إلا اللاعيبة فقط حتى مبتوصلش للإدارة، تالت حاجه / أنا واحد مخدتش فرصتي كاملة عشان تحكم عليا أنا واحد لما خدت فرصتي وبقيت ألعب كان بيتطلب مني حاجات معينة من المدير الفني بنفذها وده بيضرني كواحد مهاجم وأرقامه قليلة ولعبت في مراكز كتير في ماتشات كتير مش مركزي ولكن أنا كنت تحت أمر النادي وأي مدير فني محترم كان ماسكني وشاركت معاه أنا من أربع سنين لما كنت فريي وببلاش أنا اللي جيت نادي الاتحاد جيت عشان بحب النادي واختارته من قلبي وانا مسامح أي حد أذاني أو غلط فيا من جمهور النادي لأن دايما خوفه علي النادي فدة طبيعي عشان مش طول الموسم هيشجع ولا طول الموسم هينتقد هي دي الكوره فدايم جمهور الاتحاد على راسي مهما حصل من أصغر واحد لأكبر واحد".
وواصل: "رابع حاجة/ أنا عمري ما هسامح أي شخص أذاني الموسم ده أنا اتئاذيت من كل حاجه أنا نفسيآ اتدمرت أنا من اول الموسم لما (شخصآ ما ) قعد معايا عشان انزل من عقدي وانا رفضت عشان ده اللي اتفقت عليه من أول الموسم ومن يوم ما رفضت وأنا الدنيا اتقلبت عليا من المدير الفني والأستاذ (إ.ج ) وقالي بالحرف اليوم ده وربنا الوحيد اللي يشهد علي كل حرف أقوله، قالي ان النادي عايز ينزل من عقود اللاعيبه عشان بينزل بسقف الرواتب ردي عليه كان أنا عقدي مش كبير بس أنا موافق وتحت أمر النادي بس لما تبدأ باللي عقدهم كبير وفيه أرقام كبيرة وده طبعا ربنا يزيدهم ده رزقهم ومش هقول أرقام لأن دول اخواتي وفلوسهم هي فلوسي بس ده كان ردي".
وأردف قائلا:" قالي طيب فكر في الموضوع ولو رفضت يبقي الكلام ده بيني وبينك واكننا مقعدناش .. ده غير اللي عرفته في حوار ٥٪ بس ده مقدرش أتكلم عنه عشان ميكونش فيه أذي ليا والكلام ده كله الاداره معندهاش علم بيه، والكلام ده في فترة الإعداد أنا من بعد اليوم ده وأنا بتدمر وملعبنيش دقيقه واحدة ولا خدت فرصتي مع أن في التمرين كنت بموت نفسي واللاعيبه كلها شاهده وجزء من الجهاز شاهد وكان شايف .. ده غير انه كان بيمرني ورا الجون لوحدي ومكنتش بفتح بوقي ولا بتكلم".
وواصل: "وعشان حق ربنا وأكون قولت اللي ليا واللي عليا أنا في آخر الدور الأول كده كان عندنا ماتش مع بيراميدز كنت في الأسكور وسافرت القاهرة وفرحت خلاص قربت أشارك مابولولو اتصاب فجاب لاعيب من الناشئين يوم الماتش على الاستاد ومن غير اي سبب طلعني بره الاسكور مع أن كان واخد ٢ لاعبيه زياده عشان لو حد اتصاب فأنا غصب عني عشان أنا بني ادم زعلت وقولت حسبي الله ونعم الوكيل في كل ظالم والكلام وصله ولما صدق يلاقيلي غلطه بس أنا مغلطتش أنا بدعي ربنا للي ظالمني لو هوا ظالم".
وأضاف: "خامس حاجه / أنا لاعيب متربي في النادي الاهلي ومنتخبات المراحل بتاعتي كلها كنت متواجد فيها وشاركت فيها أنا مش لاعيب وحش الحمدلله رب العالمين أنا عندي موهبه وبحمد ربنا كل دقيقة عليها ولكن الشخص ده عمره ما حب أي موهبة بس أنا مش طالع أعلق شماعة ولا اتحجج بحاجة بس أنا واحد أتظلم الموسم كله وأنا مستاهلش كده مستاهلش كده عشان بتمرن كويس وبحترم الصغير قبل الكبير وعمري ما عملت مشكله أنا طبيعي أطلع أبرء نفسي من موسم صفري بالنسبالي عشان أنا في نادي جماهيري وده آخر موسم ليا مينفعش اسيبهم وفيه حاجه شايلنها جواهم وحشه من ناحيتي".
واختتم اللاعب حديث قائلا: "سادس حاجه / أنا لاعيب حر دلوقتي وأتمنى ربنا يوفقني وأمضي لنادي كويس أقدر أساعده ويساعدني.. أنا أسف إني طولت بس كان لازم أقول بعض الحاجات اللي حصلت معايا عشان أنا كنت بتمرن ومصحف ربنا والدمعة في عيني.. أنا وحياة ابني اللي عمري ما هحلف بيه كدب متدمر نفسيا وحسبي الله ونعم الوكيل من كل قلبي لأي شخص ظلمني.. آخر حاجة ( أنا كان لازم أوضح بعض الحاجات اللي حصلت معايا ) بس أنا ربنا عمره ما هيضيع تعبي ولا هيخذلني حتى وأنا لوحدي ومفيش حد في المجال كله واقف جنبي ".