حلت الفنانة يسرا أمس ضيفة في برنامج «بيت السعد» مع الفنان أحمد سعد وعمرو سعد، المذاع على قناة mbc، تحدثت لأول مرة عن حياتها الشخصية، وعن أول حب في حياتها.

تحدثت يسرا عن اسمها الحقيقي، قائلة:«اسمي الحقيقي اللي في شهادة الميلاد يسرا واسم الدلع اللي في البيت كان سيفين وأنا عمري ما عرفت أن دا اسمي إلا وأنا عندي 19 سنة لدرجة أن أنا شهاداتي كلها سيفين، ودا اسم تركي ومعناه الوردة اللي مش بتموت».

وعن علاقتها بـ والدها:«والدي طلق والدتي قبل ولادتي، أول مرة أشوفه كان عندي 5 سنين وقتها، عشت معه من سن 14 إلى 21 سنة بعد ما خدني من والدتي بسبب حقه القانوني في الحضانة، طفولتي كانت صعبة، كان قاسي بس اللي عمله معايا قواني وبقى عندي إصرار إني أكون حاجة مختلفة ويمكن ربنا حطني في الامتحان ده علشان أقف على رجلي وأبقى كيان لنفسي».

تابعت:«قسوة أبويا عليا مأثرتش على نظرتي للراجل، وعمري ما تصورت أن كل الرجالة زي أبويا، أنا اتجوزت مرتين، المرة الأولى متوفقتش لأن مكناش نعرف بعض كفاية ومكنش جواز ناجح بصراحة، والجوازة التانية خالد جوزي ربنا يديمه يا رب وبحبه جدا».

كشفت يسرا عن علاقتها بـ زوجها خالد:«احنا نعرف بعض وعمرنا 7 سنين، وعلاقتي بيه علاقة صحاب مش زوج وزوجة، وفي الأول ما أعلناش جوازنا لأن صالح سليم كان عيان، ومش صحيح إنه مكانش موافق على جوازنا، دا هو اللي مربيني وكان صاحب خالي وأمي، والكلمة الوحيدة اللي قالها صالح سليم لابنه الست دي نجمة هتستحمل نجوميتها ومتقرفهاش خدها، مش هتستحمل سيبها في حالها».