حل الفنان شريف سلامة ضيف إيناس سلامة الشواف في برنامج أرقام على راديو إنرجي٩٢.١ وقال سلامة إن مقولة العمر مجرد رقم دي عبث، قائلا: "الزمن من أقوى مخلوقات الله ولازم نتعظ به والتجارب مرتبطة بالنضج وبالشخص نفسه هل هو متأمل ولا سطحي.. وليست مرتبطة برقم العمر".
وأضاف شريف سلامة: "فكرة ربط أهدافنا بأرقام عمرية عبث برضه في رأيي.. وبعتذر لو كلامي صادم، الإنسان مهما كان عمره يقدر يعيش تفاصيل حياته طالما ماذاش حد ".
واستكمل: "لما القاعة بتكون كاملة العدد بحس بسعادة شديدة واستغراب شديد وأرقام الترند وهمية وعبثية وأرقام المشاهدات بنسبة كبيرة زي الترند برضه ولكن أرقام الإيرادات الوحيدة اللي نقدر عليها مؤخرا بقت مظبوطة".
وعن مقولة الفنان الأعلي أجرًا، قال: "الاعلى أجر على أرض الواقع بتفرق حتى لو ده مصنوع احنا اللي خليناه كده.. بس اللي يفرقلي أكثر جودة العمل لأن ممكن أعلى أجر يقدم أعمال سيئة فأنا هستفيد إيه؟".
واستطرد شريف سلامة: " ترتيبي على الأفيش قيمة أدبية لكن أنا بحب أريح مش بتخانق عليها لأنها مش باقية والنجومية عمرها قصير".
وواصل سلامة: " كوني ابن سلامة حسن المخرج المسرحي الكبير مخليني عاوز أكون فنان الناس تحترمه وتحترم موهبته بدون ماعمل اللي أصبح شائع دلوقتي بأهمية ارقام الفولورز وحساب مردودها لأني شايفها أوهام لا أتابع السوشيال ميديا".
واختتم حديثه: "الأرقام مش مقياس ولو ريا وسكينه عايشين كان الأكاونت بتاعهم هيجمع أكبر رقم.. المقياس هو القيمة الأدبية للفنان ومسؤوليته تجاه الناس وبينقل لهم إيه لأن الرزق اللي بيدخلنا بيقابله رسالة نقدمها للناس".