تحدث الإعلامي أحمد شوبير عن تفاصيل الجلسة الأولى لأيمن الرمادي مع لاعبي الزمالك، عقب توليه مهمة الفريق الأول رسميا خلفا للبرتغالي جوزيه بيسيرو.
وقال شوبير : "امبارح الرمادي عمل محاضرة للاعبين واتكلم عن فكره، وهقول لكم شوية أسرار من داخل الجلسة، الرمادي قال للاعبين أنا مش مبسوط، ده مش نادي الزمالك، مش ده زمالك كوارشي وأحمد رمزي والعصر الرائع ده اللي أنا أعرفه".
وأشار: "قال كمان إن مجلس إدارة النادي لازم يساندني بشكل قوي الفترة اللي جاية وعندي أفكار سأعمل على تطبيقها الفترة اللي جاية".
وأكد شوبير: "طبعا تدريب الزمالك نقلة كبيرة لأيمن الرمادي كان بيتمناها وآهي حصلت، حتى لو مجرد شهر أو شهرين، هو ممكن يخليها سنة أو اتنين وتلاتة بس خلونا نسانده كمدرب مصري ونبقى معاه للنهاية، وأي حد من أبناء الزمالك مطالب يساند أيمن الرمادي هو وأي حد على رأس الجهاز الفني دلوقتي".