حددت محكمة الجنايات المختصة، جلسة الغد الموافق 8 يوليو 2025، لنظر أولى جلسات محاكمة السائق المتهم بالتسبب في حادث الطريق الدائري الإقليمي، والذي أسفر عن مصرع 18 فتاة وسائق ميكروباص في واقعة مأساوية هزّت الرأي العام. وقد وجّهت النيابة العامة عدة اتهامات خطيرة إلى المتهم، أبرزها:
وقد وجّهت النيابة العامة عدة اتهامات خطيرة إلى المتهم، أبرزها:
تعاطي المواد المخدرة (الحشيش، والميثامفيتامين).
القتل الخطأ والإصابة الخطأ نتيجة الإهمال.
اقتحام الحاجز الخرساني الفاصل بين اتجاهي الطريق.
السير عكس الاتجاه في طريق سريع.
القيادة بدون رخصة سارية خاصة بنقل البضائع.
القيادة تحت تأثير المخدر، ما شكّل خطرًا جسيمًا على الأرواح والممتلكات
وجاءت اعترافات السائق المتهم أمام جهات التحقيق بسؤاله عن تفاصيل الحادث، قال: اللي حصل إن النهاردة، 27-6-2025، حوالي الساعة 8 الصبح، كنت ماشي على الطريق الإقليمي بعد كارتة الخطاطبة بمركز أشمون، بالعربية التريلا اللي أنا سايقها، على سرعة حوالي 50 كم/س كده تقريبًا، وكنت جاي من كارتة الخطاطبة ومتجه ناحية بنها الحر.
وأضاف: فجأة، وأنا سايق، لقيت عربية ميكروباص ماشي قدامي، فخدت أقصى الشمال علشان أعدي منها، وفجأة لقيت حجر في التلتوار اللي في النص بين الطريقين رايح جاي، الحجر اللي شبه البندورة كان خارج بره شوية عند الحد بتاعه، وكنت هخبط فيه لو فضلت ماشي مستقيم.
وأكمل: من ارتباكي، اختلت عجلة القيادة مني، واختل توازن العربية والمقطورة اللي أنا سايقهم، وعديت التلتوار اللي في النص غصب عني، واتفاجئت إني بقيت ماشي عكسي للحظات، واتفاجئت بعربية ميكروباص لونها أبيض جاية في وشي، ماعرفتش أفاديها، وخبطت فيها ببوش التريلا.
وأشار السائق: نزلت من العربية وجريت، لأن المنظر كان صعب أوي، وأنا خفت، وحسيت إنه لو ما هربتش، الأهالي كانوا ممكن يموتوني، وبعدها بحوالي ساعة تقريبًا، روحت على مركز شرطة أشمون وسلّمت نفسي، وهناك عرفت إن أغلب اللي كانوا في الميكروباص اللي أنا خبطته ماتوا، وناس منهم لسه متصابين.
وأكد المتهم أنه لم يقصد أذيتهم مشيرا إلى الحادث وقع دون قصد وبسؤاله عن عدم حمله الرخصة، قال: رخصتي ضايعة مني وأنا كنت جاي من شغلي في إسكندرية ورايح الشرقية، وعديت كارتة الخطاطبة، ومرة واحدة لقيت الميكروباص على يميني.
وأشار إلى أن سرعته وقتها كانت نحو 50 كم/ساعة: الطريق كان فاضي، والجو صباحي والإضاءة واضحة، ولا يوجد ضباب، والمسافة اللي مشيت فيها عكس الاتجاه كانت حوالي 10 متر، والمدة كانت دقيقة تقريبًا قبل ما أخبطهم، ودخلت عكس غصب عني، وده علشان كنت بعدي من ميكروباص قدامي، واختلت عجلة القيادة لما شفت الحجر، والناس ماتت غصب عني.
وبسؤاله أمام جهات التحقيق هل هناك خلافات بينك وبين المتوفين والمصابين أو أحد من أهلهم؟، أجاب قائلا: لا علاقة ولا خلافات.