كشف الفنان آدم الشرقاوي عن تفاصيل معاناته الصحية الصعبة خلال العامين الماضيين، والتي أثرت بشكل كبير على حالته النفسية والجسدية، مؤكدًا أنه تعافى تمامًا ويستعد للعودة بقوة إلى جمهوره وأعماله الفنية.
ونشر آدم الشرقاوي عبر حسابه على موقع التواصل الاجتماعي "إنستجرام"، صورة، وكتب: "كان ليا فترة طويلة ما نزلت بوستات، بس كنت محتاج أخد بريك، من سنتين كنت تعبان جدًا، كنت قريب من ١١٠ كيلو (٢٥٠ رطل)، ما كنتش قادر أتنفس كويس، عندي ضباب في الدماغ لدرجة إني ما كنتش فاكر أيامي بوضوح، آلام في المفاصل لدرجة إني ما كنتش قادر أقف كتير، والأسوأ إني كنت عندي جلطات دم في رجلي، وجسمي كله كان منتفخ بسبب مشاكل في الكلى، كنت بكره كل حاجة في نفسي، وما كنتش بعرف نفسي خالص لما أبص في المراية".
وتابع: "دلوقتي أقدر أقول إني أصحّ من أي وقت فات. رجعت لوزني الطبيعي ٨٠ كيلو (١٨٠ رطل)، بحس إني رياضي أكتر من أي وقت، موجود جدًا في اللحظة (مافيش ضباب دماغ)، وكل أعضائي شغالة تمام، حتى لما كنت عندي مشاكل صحية، ربنا تفضل عليّ بفرص كتير، ولما حسيت إني صحتي اتحسّنت، استغليت الفرص دي، أنا شاكر لحياتي ولكل تحدي واجهته، بشكر ربنا إنه خلاني أمر بالتجربة دي، عشان دلوقتي عندي نظرة جديدة للحياة، وحاسس إني مش ممكن أتحطم، شكرًا لكل الناس اللي بتدعمني. متحمّس إني أشارككم اللي كنت بشتغل عليه".
آخر أعمال آدم الشرقاوي
يُعد فيلم "شماريخ"، الذي طُرح في دور العرض عام 2023، آخر الأعمال السينمائية التي شارك فيها الفنان آدم الشرقاوي حتى الآن. وشارك في بطولة الفيلم إلى جانب الشرقاوي نخبة من النجوم، على رأسهم آسر ياسين وأمينة خليل وخالد الصاوي وسامي مغاوري، وهو من تأليف وإخراج عمرو سلامة.