تحدث فوزي الحناوي لاعب حرس الحدود الحالي والأهلي السابق، عن تفاصيل انتقاله مطلع الموسم الماضي، مؤكدًا أن تلك الخطوة كانت "قبلة الحياة" بالنسبة له، ومشددًا على أن النادي كبير واسمه معروف وله تاريخ، وهناك الكثير من لاعبي ورموز وأساطير الكرة المصرية ارتدوا قميصه وهو ما كان دافعًا له لقبول العرض وخوض التجربة.
وتابع "الحناوي" في تصريحات لأحمد المصري ببرنامج نجوم دوري نايل عبر إذاعة أون سبورت إف إم: خظة الانتقال لحرس الحدود خلصت بسرعة، وربنا كان مسهل كل حاجة، وعوضني بعد الفترة الصعبة اللي عيشتها في نادي الاتحاد السكندري تحت قيادة كابتن طارق العشري.
وأضاف لاعب الأهلي السابق: بعد انتقالي لنادي الحرس كان فارق معايا أوي أثبت للكل إني لاعب كويس، كلاعب كورة الضغوطات بتكون حواليك من كل اتجاه، وأنا في الاتحاد مكنتش مضغوط بالعكس كنت مرتاح ومبسوط لإن في ضهري جمهور يحرك الصخر، أنا لاعب تربية قطاع الناشئين في النادي الأهلي، يعني واجهت أصعب الضغوظات، وبالتالي عندي خبرات ازاي أقدر أواجهها مهما مان اسم المنافس.
وأكد لاعب الاتحاد السكندري السابق: كنت مرتاح جدًا لخطة حرس الحدود، بعد القعدة مع المسؤولين، وبعدها مع محمد يوسف اللي كنت لأول مرة بشوفه ويشوفني، كلاعب كرة محتاج تشعر بالتقدير والاحترام لاسمك ومشوارك، وده اللي حسيته جدًا بعد التوقيع، مضيفًا: محمد يوسف قالي مفيش حد حاجز مكان، اللي هيموت نفسه هيلعب واللي هيتدلع مالوش مكان معانا.
وشدد فوزي الحناوي: قررت أركز في شغلي بعد الفترة الصعبة واقفل كل حسابات السوشيال ميديا، والحمد لله عملنا موسم قوي وختمناه بالتواجد وسط التسعة الكبار، وده بمساعدة إدارة النادي والجهاز والفني وكل قطاع الكورة، مضيفًا: محدش بيعمل حاجة لوحده، ولو أحسن لاعب في العالم من غير مساندة وعدم الإدارة والجهاز الفني وزملائه مش هيعمل حاجة.
وواصل لاعب سموحة السابق: مدين لإدارة حرس الحدود والجهاز الفني بكل حاجة حصلت منهم خلال الموسم الماضي، وأنا تحت أمرهم في أي حاجة تفيد النادي سواء بالبقاء أو الرحيل، أنا مرتاح في النادي وحابب أكمل التجربة لحد نهايتها وبعدين نشوف أيه الجديد؟.
وأردف: لعبت ظهير أيسر من وأنا في قطاع الناشئين بالنادي الأهلي، ومع حسام حسن بأربعة وبخمسة في خط الظهر، ومع محمد يوسف، وبالتالي كلاعب ممكن تعمل أي حاجة في الدنيا مع مدرب واثق فيك وفي إمكانياتك.
واختتم "الحناوي": كان نفسي محمد يوسف يكمل معانا في حرس الحدود لإنه أضاف لي الكثير، لكن عرض الأهلي "ميترفضش"، وممتن لكل حاجة عملها معي لدرجة إني شاركت في مباراة 90 دقيقة كاملة في كأس الرابطة ضد الإسماعيلي وصنعت هدفين وأنا مصاب عشان أرد له جزء،
ربنا كرمنا وكرمه الموسم الماضي لإن "نيتنا" كانت صافية وكان نفسنا نعمل حاجة للنادي رغم إننا لم نكن الأفضل في مباريات كثيرة، متابعًا: متفائل بـ عبد الحميد بسيوني في الموسم الجديد، مدرب كبير وعنده خبرات وبطولات، وإن شاء الله هنكون ضمن السبعة الكبار.