كشف المخرج وليد الحلفاوي عن نظرته النقدية لأعماله الفنية وتجربته في عالم الدراما، متحدثًا عن كواليس مسلسله الجديد "كتالوج" وأسباب اختياره لأبطاله، كما تطرق إلى علاقته بمواقع التواصل الاجتماعي ورؤيته لطبيعة استخدامها.
وخلال لقائه مع الإعلامية إنجي علي في برنامج "أسرار النجوم" عبر إذاعة نجوم FM، أوضح وليد الحلفاوي إنه دائم الانتقاد لأعماله حتى بعد سنوات من عرضها، قائلًا: "أنا بنتقد أعمالي طول الوقت، حتى لو العمل من 6 سنين، وبييجي عليا وقت في المونتاج بقول كفاية ده لازم يقف علشان الشغل يطلع، وأنا الحمد لله ربنا كرمني في أعمال كتير الناس حبتها ولكني مبحبش أشوفها لأني مبشوفهاش كمشاهد وبنتقد نفسي".
وتناول أيضًا تفاصيل مسلسل "كتالوج"، مشيرًا إلى أن سبب اختياره للفنان محمد فراج لتقديم البطولة يعود إلى قدرته على تجسيد شخصية مليئة بالتوتر، قائلًأ: "الشخصية كان فيها كم من التوتر وفراج يعرف يعمل الحتة دي كويس أوي من غير ما التوتر يكون مزعج للمشاهد، إحنا محظوظين بجيل محمد فراج وتايسون".
وأضاف: "كان في ناس كتير أوي في كواليس مسلسل كتالوج كانوا بيعيطوا، وتفاجأت أننا بعد تصوير مشهد بعد وفاة الأم العمال كانوا في حالة صمت ومحدش كان عايز يتكلم".
أما عن علاقته بمواقع التواصل الاجتماعي، فأوضح الحلفاوي أنه لا يعتبرها جزءًا أساسيًا من حياته رغم إدراكه لأهميتها، قائلًا: "علاقتي بالسوشيال ميديا مش قوية، بحاول أتعلم حاجات فيها ولكني بنسى، بس واضح أنها حاجة بتزداد أهمية في الحياة والواحد لازم يركز فيها".
وتابع: "ولكن أنا لغاية دلوقتي شايفها لعبة ومبصدقش لما ناس يتخانقوا مع بعض ويعملوا إلغاء متابعة، يا جماعة أنتوا بتتخانقوا في لعبة، طب اتخانقوا بجد، أنا فاهم وجهة نظرهم وبيعملوا كده ليه ولكني مش قادر أشوفها غير لعبة".