مع اقتراب العام الدراسي الجديد، حرصت الأسر المصرية على التوجه إلى معرض أهلا مدارس الرئيس بمدينة نصر، الذي تنظمه وزارة التموين والتجارة الداخلية بالتعاون مع الغرف التجارية، للاستفادة من التخفيضات التي تصل إلى 35% على المستلزمات المدرسية.
فإن المعرض هذا العام لم يكن مجرد مكان للشراء، فهو فرصة حقيقية للأهالي لتأمين احتياجات أبنائهم من الشنط والكراسات والأدوات المكتبية والزي المدرسي في مكان واحد، وبأسعار تناسب مختلف الفئات.
وفي جولة لبوابة دار الهلال داخل أروقة المعرض في أول أيامه، التقت بعدد من الأمهات اللواتي أشدن بجودة المنتجات وتنوعها، لكن أصواتهن حملت أيضًا ملاحظات حول القوائم الطويلة من السبلايز التي تفرضها المدارس على الطلاب، والتي اعتبرنها عبئًا إضافيًا على كاهل الأسر، حتى مع وجود الخصومات.
تقول منى أحمد (أم لثلاثة أطفال في المرحلة الابتدائية): "المعرض ساعدني أوفر جزء كبير من الميزانية، خاصة مع التخفيضات اللي وصلت لـ35%، لكن بصراحة متطلبات المدارس بقت كتيرة جدًا، من كراسات وألوان وأدوات فنية وحتى مناديل ومطهرات، القائمة كبيرة أوي، وبتشكل عبء علينا كأمهات، حتى مع وجود الخصومات."
فيما تشير فاطمة محمد (أم لطالب في الإعدادية): "أنا لقيت في المعرض أسعار معقولة وجودة مناسبة، لكن المشكلة أن كل مدرسة بتطلب لستة طويلة من السبلايز، بعضها مش ضروري للطلبة في سن الإعدادي، أوقات بحس إن في حاجات زيادة عن الحد، وده بيخلي التكلفة أعلى مهما كان في خصومات."
وتوضح هبة عبدالعزيز (أم لطفلة في أولى ابتدائي): "دي أول تجربة ليا مع السبلايز، اتفاجئت إن المدرسة طالبة حاجات كتير جدًا، خصوصًا الأدوات الفنية والأنشطة، المعرض ساعدني أجيب كل حاجة من مكان واحد، لكن بصراحة شايفة إن القائمة محتاجة تكون أبسط، لأن الطفل في أولى ابتدائي مش هيستخدم كل ده."
وتقول داليا حسين (أم لولدين في الثانوي): "الأولاد في الثانوي احتياجاتهم أكبر، سواء كتب خارجية أو أدوات تكنولوجية، المعرض موفر حاجات كتيرة بأسعار مناسبة، بس المشكلة إن المدارس لسه متمسكة بالقوائم الطويلة، حتى للمرحلة الثانوية، في حاجات ممكن الاستغناء عنها لتقليل الضغط على الأسر."
وتضيف رحاب سمير (أم عاملة): "أنا سعيدة جدًا بتنظيم المعرض والتخفيضات الحقيقية، لكن اللي مضايقني أن قائمة السبلايز بقت إلزامية بشكل كبير، حتى المناديل والمطهرات اللي بتتحول لعبء إضافي، محتاجين المدارس تراجع القوائم وتراعي الظروف الاقتصادية للأسر."