السيسي: لا مساس بحصة مصر المائية

قال الرئيس عبد الفتاح السيسي: "أي تحدي خارجي مرتبط بيكم إنتم.. يمكن حد يقولي إيه حكايتك يعني، أيوه لازم تكونوا عارفين الحكاية كده، هي الدولة كده، الدولة بأهلها صامدين وواقفين.. خلاص.. يبقي الباقي ممكن ليه حدود.. الحاجة الثانية لازم نعترف إن احنا أدارنا الموضوع يعني بتفهم.. الآخرين عايزين يبقى ليهم تنمية وعندهم شعوب عددهم مثلنا ويمكن زيادة شوية.. فبرضوا هم عاوزين يعيشوا وعاوزين يبقى عندهم كهرباء.. عاوزين يبقي عندهم صناعة.. علشان يوفروا لشعوبهم زي ما إحنا بنجري على بلدنا فإحنا تفهمنا ده".

وأضاف الرئيس - خلال جلسة حول السياسة الخارجية ومكافحة الإرهاب وإعادة بناء مؤسسات الدولة في مؤتمر "حكاية وطن" – "قلنالهم مفيش مشكلة بس إحنا مش هنمس حصة المياه وده الاتفاق اللي إحنا اتفقنا عليه من مارس 2015 في الاتفاق اللي تم بينا وبين السودان.. وكده إن احنا بنقول لا بأس ولكن في إطار إن حصة مصر المائية لا يتم المساس بيها وفترات ملء السد نتفق عليها.. ليه فترات ملء السد نتفق عليها؟.. لأن إحنا عايزين لما نيجي نقول موافقين على ده ميبقاش فيه ضرر من نقص المياه اللي هيتملي بيها الخزان على مصر وعلى مزارعنا.. لأن في الآخر المياه الموجودة مش كتير أوي.. والمياه الموجودة فيه زراعة شغالة في الدلتا.. فيه أكثر من 50 مليون مصري بيعيشوا عليها.. فلو النهاردة حصة مصر لم يتم الاتفاق على الحجم اللى احنا نقبل يتخصم مؤقتا حتى يتم الملء.. لو احنا الحجم ده أكبر من الطاقة المسموح بيها هيؤثر سلبا علينا".

وتابع السيسي: "وهرجع بقى للمصريين.. إحنا عاملين أكبر برنامج لإعادة معالجة مياه الصرف الزراعي والصناعي والصحي.. أصل لما تسأليني سؤال لازم أكمله علشان الناس تسمعه ومتتخضش.. في البرنامج ده إحنا بنتكلم في أكتر من 120 إلى 150 مليار جنيه.. أه طبعا .. إنت عاوز بسرعة تقدر تحط اتنين ثلاثة أربعة خمسة مليار متر مكعب ميه كانت ما بتستخدمش تعيد استخدامها مرة تانية بشكل آمن سواء كان للاستخدام في الزراعة أو استخدامات أخرى طبقا للمعايير.. طب ده محتاج فلوس كتير.. يبقى هل ده كسؤال لما يجي حد يقولي انتو ليه في البنية الأساسية متحركين بالشكل ده مش كده.. طب قوليلي أعمل إيه.. عاوز لما أقول وأنا قاعد في موقف تفاوضي على حصة مصر المائية أقول الرقم ده عامل حسابي ليكم.. أقبل.. مقدرش أقوله صفر.. مقدرش أقول لن أسمحلك إنك تملى السد بمليار متر مياه حتى "مقدرش".. لأنه بالفعل المياه اللي عندنا يدوب تكاد تكفينا.. فعلا يعني بدون مزايدة.. أنا عاوز أقوله بضحي علشانك.. بصرف كتير أوي علشان ألبي لك طلبك ده.. زي ما أنا راعيتك إنت كمان هتراعيني.. ثم طبعا إحنا موجودين لينا مواقف واضحة وانتو سمعتو الكلام امبارح، وأنا أصريت إن هو السؤال يدي رسالته للشعب المصري.. اربطي كلامي ده يا مصريين بأحداث الثورتين" .