ألقى الرئيس عبدالفتاح السيسي، صباح اليوم الجمعة، كلمة لأهالي الشهداء عقب صلاة عيد الفطر المبارك بمسجد الفتاح العليم بالعاصمة الجديدة، قائلًا: "كان عندي ثقة إن إحنا هننجح، رغم أنها معركة طويلة".
وأضاف الرئيس السيسي: "أنا وزمايلي اللي موجودين في مصر في كل مؤسسات الدولة، في الجيش والشرطة والقضاء، كل في موقعه، الكل كان بيقاوم علشان نعدي المرحلة الصعبة دي، كنت بلمس في بعض ردود الأفعال إن المرحلة مش هتخلص، بس كان عندي ثقة في الله إن ربنا هيعينّا وهتعدي، بقول لكل أب وأم قدم أو قدمت شهيدًا أو مصابًا، إمشي في مصر، مش بس رافع راسك، بل وإنت راضي عن نفسك وعن بلدك".
وتابع: "البلد اللي فيها ١٢٠ مليون بالضيوف عايشين في أمن وأمان بفصل الله وفضلكم، وبسبب ما قدمه الشهداء والمصابون.. إحنا مش ناسيين إن المقابل كان كبير، آلاف من الشهداء وعشرات الآلاف من المصابين، منهم من فقد جزءًا من جسمه يعاني منه وأسرهم، وهذا ليس مجرد جرح سيلتئم، وهذا هو الثمن الذي شرفتونا وقدمتموه علشان كلنا في مصر نعيش كده، علشان نعيش ونبني ونعمر".
وواصل: "كان عندي ثقة إن إحنا هننجح، رغم أنها معركة طويلة قد تهد بلاد وتخربها، ده اختبار من الله سبحانه وتعالى لينا ولأسرنا اللي بيقدموا أبناءهم وآباءهم وأزواجهم ميعرفوش عنهم غير أن هم استشهدوا".
وأردف: "بقول أوعوا تقولوا إن الناس مش حاسة بينا، اللي هيعترف بفضلكم هو حال بلادنا بفضل الله، هو حالنا وليس كلامي ليس الإعلام ولا الأغاني ولا المسلسلات، هو استقرارنا بفضل الله هو الشاهد الدائم على تضحياتكم، هو حالنا واستقرارنا وما نحن فيه بفضل الله".