علقت الفنانة مي كساب عبر حسابها بموقع الصور الشهير"إنستجرام" على عيد الحب قائلة: "أنا والفالنتاين حالة منتهى السخرية.

وأضافت: "هنتكلم بجد على فكرة الحب عمره ما كان "دبدوب"، ولا حتة شيكولاتة، ولا قلب أحمر قطيفة، أو بالونة على شكل قلب منفوخ بغاز يخليها لو سبتها من إيدك تطير لفوق ولا عمرك تاني تلاقيها".

وتابعت: "الحب اللي أنا أعرفه يا ابني مش بس موقف.. ده مواقف.. ده حياة.. وفي وقت الشدة من غير ما نخاف.. راجل في ضهر ست محتاجة له -أو حتى لو مش محتاجة له - يحميها وعمره ما يجور عليها.. وعمرها في ضله ما تخاف، ابن جدع يشيل أمه ويمد إيده ليها.. بنت حنينة تحن على أبوها وتضلل بضفايرها عليه.. ست بمليون راجل تقف وراك لما الزمن يجور عليك.. حتى لو بس هتطبطب عليك".
وواصلت: "أم سهرانة على عيالها.. وأب راجع آخر اليوم مطحون بس راضي.. صاحب جدع يقف معاك وميديكش ضهره.. وصديقه من مواقفها تحتار إن كانت راجل ولا ست.. أهل وإخوات وصحبه ولمه وناس تتلم في وسطها تدفأ.. ولو بعدوا ييجي الشتا والدنيا تبقى سقيع".

واستكملت: "كلام بجد.. يتقال.. واتقال في كل الأمثال.. عن حفظ العهد، والوفاء بالوعد، وده سلو بلدنا يا صاحبي.. وده الحب في عرف الرجال.. أما صاحبك فالانتينو ده فكان آخره بيجيب البنات للعيال .. وعملوا له عيد حب.. يا أخي ........... كل عيد حب، وكل اللي بيعرفوا يحبوا بجد طيبين ..
ملحوظة كل الكلام ده ما يمنعش برضه إنك تجيب هدية حلوة لمراتك".