وجه الفنان تامر حسني الشكر للمهندس هاني محروس عبر حسابه بموقع التواصل الاجتماعي "فيسبوك".

وقال تامر في تدوينة له: "عايز اشكر صديق عمري وحبيبي المهندس هاني محروس شريك مشوار نجاحي لسبب مهم جداً القصة من أولها إن جاتلي من فترة كبيرة أغنية من الملحن المتميز بلال سرور والشاعر الراقي مصطفى حسن، وكنت حاببها جداً ولسه كنت برسم ملامح الألبوم ومكنتش عارف هل أغنيها في ألبوم أو في فيلم أو سينجل وكنت محتار جداً".

وأضاف تامر: "ومع تصوير فيلمي اتشغلت شويه لحد ما لقيت هاني بيكلمني بيقولي مش انت وصيتني أدور على موضوع يهم ويعبر عن الناس الفتره دي وملوش دعوة بالحب قولتله صح، قالي أنا جايبلك أغنية مش شايف حد غيرك بيغنيها".

وتابع تامر: "صرفت عليها من خلال شركتي كلام ولحن وتوزيع، قولتله ابعتهالي لقيتها الأغنية اللي أنا حاببها وكان ليها اسم تاني بس أنا غيرته لما أخدتها.. المهم حسيت هنا بعلامة وإشارة كبيرة أن الأغنية دي مكتوبلي أغنيها واحترمت جداً مجهود هاني وشغله على الأغنية من قبل موافقتي".

وواصل: "ولما سمعت الرؤية مكتملة قولتله أنا أتشرف إنك تنتجلي المحتوى الصوتي للأغنية دي وأنا هنتج فيديو كليب كبير يليق بالفكرة مع الرائع هادي الباجوري.. ودخلت الأستوديو وغنيتها وزودت الموال الأخير من عندي لإني حسيت إني عايز قفلة جديدة عليا في الأغنية دي".

واختتم تامر حديثه: "حبيت أقول بس إني مش لوحدي ورا نجاح الأغنية، وأشرحلكم وأشيد بمجهود كل اللي تعبوا فيها وهي أغنية عيش بشوقك".