قال الرئيس عبدالفتاح السيسي "في الجلسة الختامية كان الدكتور طارق شوقي موجود.. وقلت له يا دكتور طارق انت بتتكلم في 250 ألف فصل فقط.. الـ 250 ألف فصل.. لو انت قولت المتوسط 500 يعني 125 مليار علشان توصل لنسبة كثافة معينة مش معتبرة.. مش بنتكلم في 20 طالب في الفصل.. ثم طبعا القائمين على العملية التعليمية في مصر على أي مستوى.. يا ترى دخلهم مناسب.. أنا عارف إن دخل القائمين على العملية التعليمية لا يكفي.. بس أنا مش قادر.. بس دي إشكاليات مصر.. عارف إن احنا مطلوب مننا نعمل إصلاح لحال العاملين سواء في التعليم أو الصحة علشان توفر لهم الظروف التي تمكنهم من الانطلاق".

وأضاف الرئيس السيسي "بالمناسبة هل الموضوع ينتهي في الفصل.. هناك مدارس مطلوب رفع كفاءتها تصل إلى أكثر 55 ألف مدرسة.. الأرقام تعطينا حقائق نقدر نشوف الصورة بشكل أوضح، مؤكدا أن الدولة بتحاول تعمل في إطار قدراتها وإمكانياتها. 

وقال الرئيس السيسي إننا نقوم بإنشاء جامعات جديدة تليق بمصر، ومنذ 5 سنوات نعمل في ملف التوأمة، وعدم الترخيص لأي جامعة إلا بعد الحصول على توأمة مع جامعات عالمية ذات تصنيف عالي.

وتابع الرئيس، أنه علينا رؤية الجامعة المصرية اليابانية وجامعة زويل وجامعة الملك سلمان وغيرها من الجامعات الجديدة،.. نحن نتكلم في استثمارات إنشاء فقط بقيمة عشرات المليارات من الجنيهات وذلك في محاولة توفير بنية تعليمية كمنشآت بشكل جيد". 

وأضاف "إننا بدأنا إنشاء بنوك للامتحانات لتحييد العامل البشري وبدأنا بكليات الطب وبدأنا في هذه التجربة منذ عام ونصف من أجل تحويل الاختبارات على اختبارات مميكن بشكل كامل.. ولكن حتى دلوقتي مقدرناش ننفذها لإننا لازم نختبر أي شيء بنقترحه حتى لا تكون هناك مشاكل لأن الأمر يتعلق بمستقبل بشر" . 

واستطرد الرئيس السيسي قائلا "في التعليم العام والعالي متحركين كويس ولكن لو كانت الأمور بتتحل بسهولة زي ما إحنا متصورين مفتكرش كانت الدولة في الوضع اللي هي فيه.. العالم منقسم ما بين صفوة الدول وكتلة من الدول متأخرة.. طيب انتم يا مصريين عاوزين تبقوا مع دول.. اه.. ده جهد وعمل وتجرد ونكران ذات كبير علشان نوصل لده".