أبدى مرتضى
منصور، رئيس نادي الزمالك، دهشته من ردود الفعل التى صاحبت رفضه خوض مباراة القمة ضد
الأهلي والمؤجلة من الجولة الرابعة للدوري المصري الممتاز.
وقال منصور، في تصريحات لبرنامج "زملكاوي"
الذى يقدمه طارق يحيى على قناة الزمالك: "مندهش ومستعجب إيه الحرب دي.. إيه اللى
حصل فى ماتش النهاردة؟ مش فاهم لحد دلوقتي عماد متعب بوزه شبرين وشوبير كذلك والشيخ
طه مش طايق نفسه.. هو الأهلي مش انسحب 5 مرات أمام الزمالك والدنيا ما قامتش، يا حازم
إمام أنت وأيمن يونس ويا محمد أبو العلا يا زملكاوية يللي بتحاربوا الزمالك".
وأضاف: "قضيتي باختصار خايف على ولادنا لاعبي
الأهلي والزمالك، فيه لاعيبة انضربت عايزة تخش تضرب اللى ضربوها وفيه لعيبة في الأهلي
كانت عايزة تعمل كدة.. دي تبقى مباراة يا عمرو يا جنايني؟".
واختتم تصريحاته: "أنت عندك لائحة ولو راجل
طبقها ولو اتخصم نقطة من الزمالك هقطع كارنيه نقابة المحامين، إنما الحرب اللي قايمة
بقالها أسبوع الأخ سيف زاهر بيقول الزمالك مطلبش ليه تأجيل المباراة من البداية، وطلع
رد علينا محمد فضل وقال مش هتتأجل مبنجيش بالعند.. أنتوا ليه عايزين تساعدوا الأهلي".