في حوار بين عنايات اللي بتدي دُش ساخن لعتريس: «انت مابقتش بتعاكسني زي أول الجواز؟»، ليرد عليها عتريس: «ما هو انتي أصلا اللي نكدية، والواحد مايفكرش أساسًا إنه يتكلم معاكي مش يعاكسك!».

عنايات: «طيب.. شوية شوية علينا كدة يا عتريس، ده الست بتحب الاهتمام والمعاكسة بالنسبة لها اهتمام».

الرجل أيضا يحب الجو المليء بالضحك، وتغيير الروتين، فالمعاكسة من جهة عنايات تغير لعتريس مزاجه.

الدكتورة آمنة حسين فريد، طبيب نفسي واستشاري العلاقات الزوجية، هتساعدكم بشوية حاجات، ممكن تحسس «عنايات»، باهتمام عتريس، وتفرح عتريس بحب عنايات:

عندنا الغزل والكلام الحلو

الغزل مش مقتصر على الزوج، فهو يمدح جمال الزوجة، وكمان لازم عنايات تمدح جوزها، وتسمعه كلام حلو بخصوص رجولته؛ لأن ده بيظهر حبهم لبعض، وكفيانا بقى كلام عن العيال، والطبيخ، والمصاريف، والشغل، إديها شوية كلام رومانسي.

الكلام ده يكون موجود بينكم، عشان تجديد العلاقة، والبعد عن روتين الحياة الزوجية،

عودوا أنفسكم تقولوا الكلام الحلو لبعض، على طول، وماحدش يقول مش باعرف.

أتعلم: الرسائل ع النت ماسبوش لحد عذر ولا حجة

مش بس وقت تواجد شريكك معك في البيت، لكن كمان وقت ما تكونوا بعاد عن بعض، بتبقى فرصة ذكية، تنتهزها تعبر بها عن مشاعرك، وشوقك للطرف الآخر، برسالة صغيرة، مكالمة، ريكورد، وكل واحد وشطارته.

عتريس وعنايات ممكن لو حد منهم طلب من التاني الحاجات البسيطة دي، طرف منهم يستهزأ بالتاني، والواقع يقول إن الحاجات دي هي اللي بتسهل علينا مشاكلنا مع بعض وتزيد تمسكنا بالطرف الآخر، وعدم تواجدها؛ بيخلي الحياة مريرة ولا تطاق.

جدد حياتك دايما مع شريك حياتك بالكلام الحلو.