إذا كنت تبحثين عن بعض الأسرار التي بها تجذب زوجك إليك ويغمرك بمحبته وحنانه، الدكتورة آمنة حسين فريد، أخصائي الطب النفسي واستشاري العلاقات الزوجية، توضح لك بأسلوب مبسط كيف تصلين لمبتغاك.
وقالت الدكتورة آمنة حسين فريد:" إن الأنا عالية عند الرجل عالية جدا ولابد من الحافظ عليها إنها ما تتكسرش ولا تتخدش أمام عنايات عشان هيبته ما تروحش هدر".
وتابع:" الأنا دي هيا اللي بتخليه يخوض الحروب ويبني المستعمرات والمستقبلات كلها ويتسلق الجبال والمرتفعات، الزوج بقى يحب يحس إنه راجلك وسندك وظهرك والمسئول عنك .
علشان كده تجديه يسأل باستفاضة عن الأمور قبل ما يتخذ قرارات جديدة ويبحث بكل شبر ليعرف الطريق الصحيح لو تهتوا في الطريق.
عشان كده يا عنايات خليكي شطورة ولما يتوه في الطريق وأنتِ عارفة السكة الصح خلي لسانك بين سنانك واسكتي لحد ما يلاقي الطريق بنفسه هيحس إنه عمل إنجاز وإنه بطلك وإنه إنسان قوي يعتمد عليه.
هو مسئول بصحيح هو الراجل وأنتِ فتاة الأحلام القمراية اللي بتثق فيه وتدعمه.
أكثر كلمة يحب الزوج سماعها منك "معاك حق"، الكلمة دي بتحسسه برجولته لو قال كلمة صح قوليلها، كلما أكثرت من ذكر هذه الكلمة كلما زادت مقدار محبته لكِ في قلبه.
لما بتستدعي قوته بيديكِ العالم كله، ومن ضمن قوته نصره في الكلام "معاك حق" الكلمة دي بتشحن بطاريته من غير ما يدري ويتصرف برجولة معكِ.
معلش تعالي على نفسك وسيبيه يشعر أنه هو المتحكم بالأمور وساعتها سيصبح الملك بتاعك وكمان ملكك شوية تكتيك نسوي.
دايمًا حسسيه إنه البطل صاحب العضلات المفتولة هو اللي بيقدر يعمل كل حاجة ويشيل كل حاجة وأنتِ الضعيفة المسكينة اللي ما بتعرف تموت ناموسة!
في قصة عن واحدة أتقدم لها راجل فقعدت تحكيله إزاي موتت سحلية لقيتها في البيت، الراجل خرج وما رجعش تاني !!
دي مش وظيفتك آه مش وظيفتك وهو موجود معاكِ، الراجل مسئول الأمن والحماية وهو الراعي وسيكورتي الدفاع عنك وحمايتك من المخاوف وحمل الأثقال، ربنا خلقه كده أقوى منك جسمانيا. فما تعترضيش على حكمة ربنا، وتكلفي نفسك فوق طاقتك وهوا يبقى قاعد باشا وإنتي محملة نفسك وشايله كل حاجة فوق كتافك وبعدها تقعدي ساعتين تشتكيله وتقوليله إنت مش حاسس بيا.
طب مانخلينا ع مثل "القفة اللي ليها ودنان، يشيلوها اتنان" إنتِ شوية وهو شوية إنت حاجات تيجي ع نفسك فيها وهو حاجات يضحي بيها علشان الحياة تستمر من غير ما واحد منكم يقع في نصف الطريق .
رجاء لا تتبادلوا الأدوار "كل ما هتمثلي أكتر إنك طرزان هيمثل أكتر إنه جين ."
عشان كده تلاقي في ستات مفحوتة شغل وأولاد وبيت ودروس وتدريب وطبخ وغيره، حبيبتي إنتِ شيلتي عنه بزيادة فهو بقي مدلل بزيادة،
أو نلاقي زوج مفحوت ومضحي بكل حاجة تسعده عشان يوفر لقمة العيش لولاده وهي قاعدة ما بتعملش حاجة.
الزوج المدلل بزيادة أو الست اللي مكبرة دماغها، أحب أقولكم شريك حياتك.. آه والله اسمه شريك حياة يعني بيشاركك ويقاسمك ويتعاون معاك، لما ما بتشركهوش في حياتك للأسف الأمثلة بتثبت إنه بيدور على شخص تاني غيرك يشاركه حياته ويتشارك معاه حياته .
الراجل بيدور على واحدة تغذي عنده الأنا، والست بتدور على واحد يدلعها ويهنيها .
ما تموتيش أي حاجة بوجوده، الكهربا قطعت اتحامي فيه، اللمبة اتحرقت استنجدي به، خليه يحس إنه راجل إنه مسئول إنه هيرو.
أنت تعبت سيبها تراعيك ، أنت متضايق أديها فرصة تسعدك وتحس إنها ليها قيمة عندك وإنك محتاجلها زي ما هي محتاجلك .
هو بيفرح موت باللي بتبينله ضعفها العضلي وقوته هو .
ومهم جدا تشكريه لازم وتقوليله من غيرك ما نسوى من غيرك ما كنا نعرف نتصرف.
ساعتها هيمنحك العالم بأسره لما تحسسيه إنه "الملك".