تحدث عماد متعب، مهاجم النادى الأهلى ومنتخب مصر السابق، عن رحيله عن صفوف المارد الأحمر وحول تلقيه عرضا من نادي بيراميدز، مشيرا إلى أنه لو عاد به الزمن وتلقى عرضاً من الأخير كان سيرفضه خوفاً من زعل فرد واحد من جمهور الأهلى.
وقال متعب خلال حديثه عبر برنامج وان تو عبر إذاعة أون سبورت إف إم: "أسعار اللاعبين رزق وكل واحد بياخد نصيبه، وفى وقتنا كنا بناخد فلوس حلوة بردو، بس لما بقعد مع نفسى بندم إنى ضيعت فلوسى بإسراف شديد قبل الجواز والخلفة".
وتابع: "لعبت فى الأهلى بالفترة من 2004 وحتى 2008 بعقد من الناشئين كنت أتقاضى 150 ألف جنيه ثم 200 ثم 250 وتنتهى بـ 300 ألف جنيه وكنت حاصل على 2 كأس أمم أفريقيا والأهلى لم يعدل عقدى ولم أطلب التعديل وكنت راضى بنصيبى لأن محدش ضربنى على إيدى وقالى وقع".
وأردف: "لما رجعت من إعارة اتحاد جدة كان عقدى بقى 800 ألف جنيه ولما روحت بلجيكا وحبيت أفسخ عقدى فى 2010 دفعت الفلوس كلها من جيبى وبعدين حصلت الثورة ووقفت الكورة موسم 2011-2012 وتنازلنا عن 15% من عقودنا ورغم أنى حصلت على اموالى بالكامل من الاهلى لكنى كنت مسرف للغاية".
وأوضح متعب: "كل من حولى نصحنى بادخار أموالى قولتلهم أنا مش متجوز ولا مخلف، ودلوقتى عرفت أنهم كانوا صح، معملتش فلوس من الكرة زى ما الناس متخيلة، معظمها كانت الإعلانات ومكافآت البطولات وطبعا إعارة اتحاد جدة ولكنه نصيب وأنا راضى".
واختتم متعب حديثه قائلا: "لو عاد بى الزمن وتلقيت عرضا من بيراميدز والله كنت سأرفض، هى بتختلف من لاعب للاعب أنا مقدرش أزعل واحد بس من جمهور الأهلى، وفى لاعب بيشوف إن ده رزق وحقه أنا صح وهو صح".