عقب تصريحات النجم أحمد السقا، عن غضبه من النجم تامر حسنى بسبب نشر بوستر دعاية فيلمه "الفلوس" بصورته، والترويج للفيلم بأنه من بطولة أحمد السقا، قام النجم تامر حسنى بنشر توضيح على خاصية "ستورى" عبر حسابه بموقع التواصل "انستجرام" قائلاً فيها:
«حبيبي وأخويا وصديق العمر ونجم الدنيا كلها أحمد السقا، كنت أتمنى أنك تكلمني بيني وبينك لو كنت زعلان من أي حاجه غلط، إن الحاجات دي لايمكن تفوتك وأنا كنت أتمنى مكتبش الكلام ده هنا، بس علشان بعد كلامك في التلفزيون الجمهور الكريم بقى ليه حق إنه يفهم الصح".
وأوضح تامر حسني: «عشان أفكرك بس.. أنت كلمتني وقولتلي في خبر في موقع وعليه صورة افتراضية للفيلم وكاتبين أنك بطل في الفيلم، وأنا رديت عليك إن دي اجتهادات صحفية، والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة ولا يمكن تعمل كده، لأن الفيلم متباع للخارج والداخل باسم أخوك تامر حسني، وأصلا أفيش الفيلم الرسمي نزل والناس كلها شافته وأنت مش فيه ولا فيه اسمك، وكل الأبطال طالعين مرسومين معرفش زعلك من إيه الحقيقة، كان ممكن تزعل لو الكلام ده نزل على صفحتي، أو صفحة الشركة المنتجة.
وأضاف تامر حسني: «وأنا شرحتلك ده من سنة وأتكلمنا بعدها مرتين، مرة عيدت عليك في عيد ميلادك والثانية بخصوص برنامجك، لو كنت لسه زعلان كنت هتقولي ساعتها الفيلم بقاله سنة يا أحمد، أخيرا بقى مستحيل الشركة تروج أو أنا أفوت أو أسمح باستخدام اسمك كبطل، في الفيلم وأنت مش فيه، لأن ده هيعود عيلنا كلنا بالضرر، لأن الناس هتدخل الفيلم مش هيلاقوا الكلام ده، فا يبقى احنا كده بنضحك على الناس وضرينا الفيلم، ولأن أكيد يشرفني إن أحنا نمثل مع بعض بطولة مشتركة، لأنك حبيبي بجد ونجم أنا بحبه من قلبي فعلا.
واختتم تامر حسني: «وبعدين يا حج أحمد لما أنا جيتلك مسلسلك حصل اجتهادات كتير من محبينك الكرام، شوية يقولوا المسلسل بطولتنا وشوية يقولوا لا ده ضيف شرف بس، وأنت عارف أنا عمري ما عملتها وطلعت ضيف شرف غير ليك، ده أنت طلبتني أجي أصور الساعة 8 الصبح كنت عندك في نص ساعة، عشان فكرة طلعت في دماغك فجأة وجيت لإنك غالي عندي أوي أوي ،فوق ما تتصور، وكنت بفرح بإجتهادات محبينك ومحبيني حتى لو صورتي صغيرة ،أو كاتبين بطولة أو ضيف شرف، كل ده مش فارق لأني جيت أخدم صديق عمري ،وأتمنى أي كلام يصب في مصلحة مسلسل أخويا وينجح ويكسر الدنيا، أنت حبيبي يا أحمد وصديق عمر، عشان كده أنا اللي مش هزعل منك، معلش طولت في الكلام لأن برضو زعلك يعز عليا.».