"عم صابر"

هَذَا ابْن هَذِي الأَرضِ والأَرضُ تَعْرِفُه

إن ضَلَّهُ النَّاسُ الأَرضُ تُنْصِفُه

يَمْشي الهُوَينَا عَلَى قَدْر الزَّمانِ كَأنَّه

لَو شَاءَ يُجْريه أَو شَاء يُوقفُه

عم صابر...

لو تسأله مهنته

يضحك يقول : فلاح

عازق بفاسى الزمن

طارح بذور وصباح

عاشق بلاد النيل

وإللى عشق الجمال

لازمًا يعيش سواح

عم صابر .. لسه صابر

لسه ماسك فى الحقيقة

لسه قابض ع السلاح

لسه صاين عهد ضيفه

لسه سانن حد سيفه

لو تناديه الصلاة،

أو يناديه الكفاح

عم صابر

لسه قاعد وحدها الأيام تعدى

ييجى باشا، تيجى هانم

ييجي خوجه، ييجي هندى

لسه قاعد عم صابر

وحدها الأيام تعدى

قلبه زى النيل بيدى

عم صابر

تشرق الشمس بكفوفه

أصله (رع)

فرعون وجوا الحرب شوفه

عم صابر

لسه يروى الأرض دمه

لسه طرح النيل عشاه

لسه عرض الأرض عرضه

لسه طمي النيل غطاه

لسه ماشي عم صابر

والزمان ماشى .. وراه

الله عليك يا عم صابر